Vetingu, si ndryshoi formula, ja si do zgjidhen gjyqtarët
Nuland telefon Bashën, SHBA: Konsensusi, mesazh i fortë
Ndihmëssekretarja amerikane e Shtetit, Viktoria Nuland, vlerësoi rolin e kryetarit të Partisë Demokratike, Lulzim Basha, në arritjen e konsensusit në miratimin e Reformës në Drejtësi.
Zyra e shtypit e Partisë Demokratike, përmes një njoftimi për mediat, bën të ditur për telefonatën që Basha pati me zyrtaren e lartë të Departamentit të Shtetit. “Kryetari i Partisë Demokratike, Lulzim Basha, zhvilloi një bisedë telefonike me ndihmëssekretaren amerikane të Shtetit, z. Viktoria Nuland, e cila shprehu përgëzimet e saj për arritjen e marrëveshjes për Reformën në Drejtësi. ‘ Me qëndrimet dhe veprimet e tua ke dëshmuar se je një patriot për vendin dhe interesat e tij’, iu drejtua Nuland, Bashës. Ndihmëssekretarja amerikane më tej theksoi se ky sukses nuk do të kishte qenë i mundur pa lidershipin e treguar nga z. Basha”, thuhet në njoftimin e zyrës së shtypit të Partisë Demokratike. Në vijim të telefonatës, kreu demokrat ka vlerësuar rolin e zyrtares amerikane në arritjen e konsensusit. “Kryetari i Partisë Demokratike shprehu mirënjohjen e thellë për ndihmën vendimtare të zonjës Nuland për arritjen e konsensusit dhe për vëmendjen dhe mbështetjen e palodhur e të jashtëzakonshme të treguar që në ditën e parë të këtij procesi e deri në finalizimin e tij. Basha shprehu vlerësimin e jashtëzakonshëm dhe mirën- johjen për ambasadorin Donald Lu, i cili ka luajtur një rol kyç në këtë proces të gjatë, të mundimshëm dhe të vështirë”, thuhet në njoftimin e zyrës së shtypit. Për kreun e opozitës, sfida e ardhshme e Shqipërisë janë zgjedhjet e lira dhe të ndershme, për të cilat Basha kërkoi mbështetjen e SHBA- ve. “Basha theksoi se ky proces historik u mbyll me sukses, dhe duke garantuar standardet më të larta, pikërisht nga mbështetja e Shteteve të Bashkuara të Amerikës, që edhe një herë iu gjendën në krah Shqipërisë dhe shqiptarëve, si në ngjarjet e tjera madhore që nga shtetformimi, anëtarësimi në NATO dhe pavarësia e Kosovës.
‘ Sfida e ardhshme e zgjedhjeve të lira dhe të nder- shme do të kërkojë po kështu një angazhim dhe mbështetje të madhe të SHBA- ve’, theksoi kryetari i opozitës. Zonja Nuland e garantoi zotin Basha për mbështetjen e SHBA- ve për zgjedhje të lira dhe të ndershme”, thuhet në njoftimin e zyrës së shtypit të Partisë Demokratike. Ndihmëssekretarja amerikane e Shtetit, Nuland, ishte zyrtarja e lartë, e cila i vuri mbi tryezë palëve draftin hibrid, të cilin 140 deputetët e Kuvendit të Shqipërisë e votuan me disa ndryshime pas mesnatës së 21 korrikut.