Grabitja e Rinasit, gjendet furgoni i autorëve
Automjeti pa targa u gjet pranë "Pallatit me Shigjeta"
Furgoni i përdorur nga grabitësit e 1 milion eurove në pistën e Aeroportit të Rinasit është gjetur i braktisur në afërsi të "Pallatit me Shigjeta", në Tiranë.
Automjeti i bardhë, tip "Ford", pa targa, ndodhet i sekuestruar prej 10 ditësh në Drejtorinë e Policisë së Tiranës, ku ekspertët po kryejnë ekzaminimet e nevojshme për administrimin e provave. Megjithatë, burimet thanë se deri tani ende nuk është gjetur asnjë gjurmë gishtash apo ndonjë mbetje biologjike që të çojë në identifikimin e autorëve. Furgoni është gjetur në Tiranë mbrëmjen e datës 12 korrik dhe ka të njëjtat karakteristika me mjetin të fiksuar nga kamerat e sigurisë përg- jatë rrugës nga Rinasi në Laknas e deri në Kamzë. Një automjet i ngjashëm, furgon mallrash i bardhë, është përdorur nga grabitësit e Rinasit për t'u larguar nga vendngjarja, pasi i vunë flakën makinës "Benz", me të cilën u futën brenda pistës së avionëve. Për këtë arsye, grupi hetimor dy- shon se bëhet fjalë për të njëjtin automjet. Furgoni po mbahet tashmë në mjediset e Drejtorisë së Policisë së Tiranës, si një provë mjaft e rëndësishme për hetimin e ngjarjes. Burime konfidenciale nga Policia e kryeqytetit thanë se në vëzhgim po mbahen 2 grupe kriminale, një në zonën e Burrelit dhe një grup tjetër me tendencë grabitjet, ku bëjnë pjesë edhe disa shtetas kosovarë me precedentë të mëparshëm penalë. Hetimet po udhëhiqen nga Prokuroria e Krimeve të Rënda, pasi ka dyshime se vepra është kryer nga një grup i strukturuar kriminal, i cili mund të ketë kryer edhe grabitjet e tjera të bankave gjatë 18 muajve të fundit. Burimet thanë se hetimet po vijojnë me intensitet për identifikimin dhe arrestimin e autorëve të ngjarjes. Ndërsa dosja hetimore, që fillimisht ishte në Policinë e Durrësit, i ka kaluar Policisë së Tiranës, për shkak të di- namikës së ngjarjes, por edhe për mungesë të kapacitetit të nevojshëm për ta hetuar këtë ngjarje të rëndë nga Komisariati i Krujës, ku u referua fillimisht ngjarja. Megjithatë, deri tani ende nuk ka një të dyshuar konkret si autor të grabitjes spektakolare të ndodhur në Aeroportin "Nënë Tereza".