Konsensusi, Meta falënderon Kukan dhe Fleckenstein
Kryetari i Kuvendit, Ilir Meta, falënderoi eurodeputetët, Eduard Kukan dhe Knut Fleckenstein, për kontributin që dhanë në arritjen e konsensusit mes palëve në Kuvendin e Shqipërisë. Zyra e shtypit pranë kreut të Kuvendit njofton se “Kryeparlamentari Meta zhvilloi një bisedë telefonike me eurodeputetët, z. Eduard Kukan dhe z. Knut Fleckenstein”.
“Gjatë bashkëbisedimit me z. Eduard Kukan, kryetari Meta e falënderoi për rolin e tij dhe të Partisë Popullore Europiane në miratimin e Reformës në Drejtësi. Z. Meta e vlerësoi konsensusin e arritur si vendimtar për suksesin e Reformës në Drejtësi. Eurodeputeti, z. Eduard Kukan, falënderoi kryetarin e Kuvendit, z. Ilir Meta, për konsensusin dhe theksoi se tashmë Shqipëria është më europiane se dje”, thuhet në njoftimin e zyrës së shtypit. Meta e ka cilësuar vendimtar rolin e tyre në arritjen e konsensusit. “Kryetari i Kuvendit vlerësoi dhe rolin e eurodeputetit, z. Knut Fleckenstein, si vendimtar për arritjen e konsensusit. “Roli juaj ka qenë vendimtar për konsensusin. Mirënjohje për përkushtimin tuaj”, tha z. Meta. Eurodeputeti Fleckenstein u shpreh se Shqipëria ka tashmë një perspektivë europiane të qartë”, thuhet në njoftimin e zyrës së kreut të Kuvendit. Menjëherë pas miratimit të Reformës në Drejtësi, raporteri për Shqipërinë në Parlamentin Europian, Knut Fleckenstein, përmes një mesazhi në “Facebook”, tha se do të kërkojë hapjen e negociatave me Shqipërinë pas këtij votimi. “Sa ditë e bukur për Shqipërinë! Reforma gjyqësore është miratuar nga Kuvendi i Shqipërisë. Tani kolegë të mi në Parlamentin Europian do të kërkoj nga Këshilli Europian të vendosë për hapjen e negociatave për anëtarësim sa më shpejt të jetë e mundur. Një hap i mëtejshëm i Shqipërisë drejt Bashkimit Europian”, shkruan Fleckenstein në një status të tij në “Facebook”. Ai nuk sheh asnjë humbës nga ky miratim. “Kush janë fitues, kush humbës, pas gjithë debateve e diskutimeve dhe betejave? Unë nuk mund të shoh ndonjë humbës, dhe mua nuk më pëlqejnë diskutime të tilla idiote. Por unë jam i sigurt, nëse ne të gjithë do të punojmë shumë, në qoftë se ne të gjithë i kushtojmë vëmendje, nëse ne jemi të durueshëm, por të drejtë, fitues do të jetë brezi i ri”, shkruan ai.