Prenga votoi pro edhe për arrestimin e deputetëve

Një nga deputetët më të zellshëm në votim ishte pa dyshim Armando Prenga. Prezenca e deputetit të Lezhës, i cili aktualisht është në masë “arrest në shtëpi”, ishte vota e 140- të në seancën e ditës së enjte. Sipas procesverbaleve të votimit, Armando Prenga ka votuar të gjitha nenet e Kushtetutës, madje dhe nenin që i jep të drejtë Prokurorit të Përgjithshëm dhe drejtuesit të Prokurorisë së Posaçme Antikorrupsion të arrestojë deputetët, kur kapen në kushtet e flagrancës apo kur kryejnë një vepër penale.

Edhe pse ndryshimet kushtetuese të së enjtes arrtën një numër historik votash, nga zbardhja e procesverbaleve të votimit rezulton se ishkryetarja e Kuvendit, Jozefina Topalli, u ka qëndruar deklaratave të saj për cenimin e sovranitetit. Ndërkohë që ish- kryeministri Berisha dhe pjesa tjetër e Grupit të PD- së votuan pro. Ish- nënkryetarja e Partisë Demokratike, sipas procesverbalit elektronik, mësohet se nuk ka votuar “Aneksin B” të Kushtetutës, i cili parashikon rolin e Operacionit Ndërkombëtar në procesin e vetingut. Ashtu si Topalli, këtë nen nuk e ka votuar as kryetari i Komisionit të Medias, demokrati Genc Pollo, ndërkohë që vota e tretë që nuk iu bashkua linjës së Grupit ishte ajo e Vangjel Tavos së LSI- së. Në total “Aneksi B” i Kushtetutës mori 137 vota pro dhe vetëm 3 deputetë nuk morën pjesë në votim. Por, pavarësisht se tre deputetët nuk votuan këtë pikë të Kushtetutës së re, ata dhanë votën pro në parim dhe në tërësi, duke e çuar numrin e votave në 140, votimi më absolut i të gjitha kohërave.