U njoh me “Toni Montanën”, vajza tenton vetëflijimin
Lidhja nga “Facebook”- u, por “i dashuri” e prostituoi pas takimit në Lezhë. 23- vjeçarja u hodh nga kati i dytë
Njohja me “Toni Montanën” në rrjetin social “Facebook” pasoi një fund të dhimbshëm për një vajzë 23 vjeçe nga Korça.
“I dashuri” virtual, i divorcuar dy herë më parë, e kishte bindur vajzën me iniciale E. M., që të braktiste familjen e saj dhe të nisej për një jetë të re në Lezhë. Por Filip Shtjefni, i cili në rrjetin social ishte regjistruar si “Toni Montana”, e ka mbajtur atë peng për tri ditë dhe e ka shfrytëzuar në një lokal që dyshohet se e përdorte për qëllime të tilla. Pas tri ditësh, ajo ka mundur të largohet dhe të bëjë denoncim në Policinë e Lezhës. Në gjendje të tronditur, me sa duket ka pasur frikë të shkojë në banesën e saj në Korçë, ndaj i ka kërkuar policisë që ta dorëzonin te një kushërirë e saj në Tiranë. Por në kushtet e një tronditjeje të fortë psikologjike, si pasojë e shfrytëzimit jashtë dëshirës së saj dhe zhgënjimit nga i dashuri, ajo ka tentuar të vetëvritet duke u hedhur nga kati i dytë. Gjendja e saj është mjaft e rëndë, ndërsa policia dje ka arrestuar të dyshuarin, Filip Shtjefni ( me nofkën Toni Montana), 49 vjeç, nga fshati Gramsh i Lezhës dhe Lula Marku, 47 vjeçe, nga qyteti i Lezhës.
Sipas Policisë, këta dy shtetas në bashkëpunim me njëri- tjetrin kishin marrë një lokal me qira në rrugën e “Shtrausit” dhe e përdornin prej disa kohësh si kamuflim për shfrytëzim prostitucioni. Vajzat gjendeshin nga ana e 49vjeçarit, nëpërmjet rrjetit social “Facebook”. Ai dyshohet se “peshkonte” vajza, kryesisht nga rrethe të tjera të vendit, të cilat, pasi i bënte të dashuroheshin pas tij që në bisedat virtuale, më pas i ftonte për takim në Lezhë. Pikërisht këtu niste aventura, pasi në vend të martesës dhe jetës së lumtur, ashtu siç iu premtonte në biseda më parë, ai i detyronte ato të prostituonin në lokalin e marrë me qira.
Ka qenë denoncimi i 23vjeçares nga Korça, e cila çoi në zbulimin e kësaj baze prostitucioni. Vajza me iniciale E. M. ka deklaruar disa ditë më parë në Polici se 49- vjeçari nga Lezha e kishte mashtruar, duke e detyruar që të vinte në Lezhë. Gjatë kësaj kohe ajo është mbajtur për tri ditë peng nga ana e tij, duke u shfrytëzuar për prostitucion brenda lokalit. Policia bëri të ditur se në kushtet e gjendjes së rënduar psikologjike nga ajo çfarë i kishte ndodhur, 23- vjeçarja nga Korça ka tentuar që të vrasë veten. “Vajza është hedhur nga kati i dytë i apartamentit të një të afërmes së saj në Tiranë. Për pasojë ka marrë plagë të shumta dhe ndodhet në Spitalin e Traumës nën kujdesin e mjekëve. Fatmirësisht, tashmë është jashtë rrezikut për jetën”, bënë të ditur burime nga grupi i hetimit. Kjo ngjarje ka vënë menjëherë në lëvizje policinë, e cila mori në pyetje vajzën dhe zbuloi më pas të gjithë historinë që asaj i kishte ndodhur. Pas tri ditësh kërkime, policia prangosi 49vjeçarin Filip Shtjefni, si dhe 47- vjeçaren Lula Marku. Blutë kanë dyshime se dy personat e ndaluar kanë shfrytëzuar dhe femra të tjera për prostitucion. Pritet dhe dëshmia e dy të ndaluarve për të mësuar më tepër detaje rreth ngjarjes. Policia bëri të ditur se materialet në ngarkim të dy të arrestuarve iu referuan Prokurorisë së Rrethit Gjyqësor Lezhë dhe Tiranë. Siç mësohet, 49vjeçari Shtjefni është person i dënuar edhe më parë. Ai ka jetuar prej shumë vitesh në Itali dhe është kthyer rreth tri vite më parë në Lezhë. e. d