Matura shtetërore, dalin datat e provimeve për sezonin e vjeshtës
Caktohen datat e provimit për sesionin e vjeshtës. Rreth 7 mijë maturantë, të cilët nuk kaluan me sukses fazën e parë të provimeve do të kenë shansin e radhës. Ministria e Arsimit ka publikuar dje udhëzimin “Për zhvillimin e provimeve të Maturës Shtetërore 2014, sesioni i dytë”. Sezoni i provimeve nis më 30 gusht dhe përfundon më 10 shtator. Kjo fazë starton me gjuhën e huaj, për të vijuar më 2 shtator me lëndët Gjuhë shqipe dhe Letërsi. Katër ditë më vonë është provimi i Matematikës, konkretisht më 6 shtator dhe në mbyllje janë lëndët me zgjedhje. Maturantët që do të arrijnë të kalojnë me sukses këtë fazë do t’i krijojnë vetes mundësinë për të garuar në universitet. Nga sezoni i qershorit rezultojnë mbetës 7 mijë maturantë. Por, krahas tyre janë edhe 1500 të tjerë që rezul- tojnë mbetës në një apo më shumë lëndë gjatë vitit shkollor. Këta të fundit, po ashtu, kanë të drejtë të futen në testim. Lidhur me përmbajtjen e tezës, në udhëzimin e firmosur nga ministrja e Arsimit, Lindita Nikolla, thuhet se testi për secilin nga provimet e detyruara do të përmbajë 25 pyetje, nga të cilat 13 janë me përgjigje alternative dhe do të vlerësohen me 13 pikë ndërsa 12 pyetje janë me zgjedhje dhe do të vlerësohen 37 pikë. Kohëzgjatja e provimit do të jetë 2 orë e 30 minuta. Sakaq, për provimet me zgjedhje, teza do të përmbajë 20 pyetje dhe kohëzgjatja do të jetë 3 orë. Po dje, Ministria e Arsimit ka publikuar datat e provimeve të vjeshtës edhe për nxënësit e shkollave 9- vjeçare. Për ta testimi nis sot me gjuhën e huaj. Ndërkohë 2 ditë më vonë është testimi në lëndën Gjuhë shqipe. Sezoni mbyllet më 29 gusht me provimin e Matematikës.