Tragjedia, shkon te puna e nënës, vdes në ashensor 15- vjeçari
Shkëputet kavoja, bie në gropën e ashensorit të fabrikës
Një 15- vjeçar nga Durrësi ka humbur jetën aksidentalisht, pasi ka rënë në gropën e një ashensori të një firme private.
I dëmtuar rëndë mbeti edhe një punonjës, i cili teksa ka tentuar të ndihmojë adoleshentin, është rrëzuar edhe vetë. Fatkeqësia për familjen Lala nga Spitalla është shënuar mesditën e 26 gushtit, rreth orës 14: 00, në lagjen nr. 14 Shkozet. Sipas Policisë lokale, 15- vjeçari Klodian Lala ka rënë nga një lartësi prej 6 metrash në ashensorin e një firme këpucësh, që gjendet në zonën e Shkozetit, duke gjetur vdekjen brenda pak minutave. Burime për "Panoramën" bëjnë me dije se djali 15 vjeç kishte shkuar në punën e nënës së tij për librezën e dritave, pasi OSHEEja i kishte ndërprerë energjinë. Familja e tyre rezultonte debitore dhe për këtë shkak ishte bërë edhe prerja e energjisë. Nëna e Klodianit punon si sanitare në firmën e prodhimit të këpucëve. Ajo i ka kërkuar të birit 15- vjeçar që t'i sillte librezën, në mënyrë që ajo, kur të mbyllte orarin e punës, të shkonte për të kryer pagesat e faturave në zyrat e OSHEE-së. Nga hetimi i kryer nga Policia e Durrësit, 15- vjeçari rezulton se ka qenë duke pritur nënën të dilte nga godina e firmës ku punonte. Nga kureshtja ai ka nisur të luajë te ashensori që përdorej për transportin e materialeve të punës nga poshtëlart e anasjellas. Dëshmitarët thanë se adoleshenti ka bërë disa herë hip e zbrit nga lartësia, kur në një moment ka ndodhur edhe shkëputja e kavos dhe rënia tragjike e tij drejt e në tokë. Punonjësi i firmës, 44- vjeçari me inicialet B. D., i cili ka parë momentin, është përpjekur për ta shpëtuar djalin, por ata janë rrëzuar që të dy bashkë në gropën e ashensorit, që përdorej për transportimin e materialeve. Për pasojë, 15vjeçari ka humbur jetën në vend nga përplasja e fortë me tokën dhe hekurat e ashensorit, ndërsa punonjësi i firmës ndodhet në spital, nën kujdesin e mjekëve. Policia e Durrësit, në bashkëpunim me Prokurorinë kanë nisur hetimet për sqarimin e plotë të kësaj ngjarjeje. Nga të dhënat paraprake ka rezultuar se kemi të bëjmë me një ngjarje aksidentale, ndërsa vijojnë hetimet për zbardhjen e plotë të këtij aksidenti që rezultoi fatal për 15- vjeçarin. Policia ka hetuar dhe ka dalë në konkluzionin se 15-vjeçari nuk është punonjës i firmës ku ndodhi ngjarja, por ndodhej aty në mënyrë krejt rastësore, pasi ishte thërritur nga nëna e tij. Sipas mjekëve të spitalit, goditja e fortë me tokën i ka shkaktuar plagë të shumta 15vjeçarit Lala, duke i shkaktuar vdekjën. Me gjithë ndihmën e dhënë, për Klodian Lalën nuk është bërë dot asgjë, pasi ai mbërriti në spital i pajetë. Ndërkohë, nën terapi po mbahet punonjësi i firmës që tentoi të shpëtonte adoleshentin, por përfundoi edhe vetë i përplasur në tokë.