Shehu: Unë i vjetër? Jam bërë profesor që 22 vjeç
“Kam punuar me të rinjtë, dhe ata janë burimi i energjisë”
Kryetari i opozitës Lulzim Basha dhe kandidati i koalicionit të djathtë për Bashkinë e Dibrës kanë zhvilluar një takim me të rinjtë e Peshkopisë.
Kreu i PD-së, Lulzim Basha, theksoi se rinia është pararendëse e fitores së PDsë në Dibër dhe gjithë Shqipërinë. Ashtu si në vitet ‘ 90, edhe sot është detyrë e rinisë të largojë të keqen dhe t’ua kthejnë Dibrën dibranëve. “Ju jeni paralajmëruesit e parë të fitores sonë. Fitorja nuk është kurrë më e siguritë se sa kur është në duart e rinisë dhe fitorja në Dibër është në duart e rinisë dibrane”, tha Basha.
PËRGJIGJJA Nga ana tjetër, kandidati i PD- së për Bashkinë e Dibrës u ka dhënë përgjigje akuzave të Kryeministrit Rama se është i vjetër dhe në prag pensioni. Por për Sherefedin Shehun rinia është burimi i energjisë për zbatimin e projekteve të tij për Dibrën. Ai u shpreh se ka qenë profesor që në moshën 22- vjeçare dhe se ka punuar me të rinjtë. Krijimi i kushteve për arsimim dhe mundësive për punësim janë prioritet i Sherefedin Shehut. “Ju na jepni zemër. Ju jeni dëshmia që fitorja vetëm pret datën 11. Edi Rama ka thënë që unë jam pak i vjetër, por fatmirësisht unë jam rritur me rininë. Që në moshën 22- vjeçare unë kam qenë profesor. Ju do të jeni pjesa e ndryshimit të qytetit. Unë do t’ju mbështes që të shkolloheni ashtu siç e meritoni ju dhe Dibra. Dibra është vendi me pasuri intelektuale. Dibra është vendi me një trashëgimi të madhe dhe kësaj pasurie ne do t’ia rrisim vlerat, duke sjellë investime në Dibër. Flasim për investime private. Ne do të krijojmë një vizion të ri, por realizimi i tyre kërkon energji dhe atë energji do ta marr te ju. Ju do të jeni energjia e realizimit të projekteve të zhvillimit të Dibrës”, tha Shehu.