Zhduken për 20 orë tri të mitura, dorëzohen në Policinë e Elbasanit
POGRADEC - Tri vajza të mitura janë zhdukur nga banesa e tyre për thuajse 20 orë, ndërsa janë vetëdorëzuar në Policinë e Elbasanit pa bërë të qarta arsyet e largimit. Pas alarmit nga babai i dy prej vajzave adoleshente dhe lajmit për kërkimin e tyre, dy motrat dhe shoqja e tyre u vetëdorëzuan mbrëmjen e djeshme në Elbasan. Ato kanë thënë se u larguan vetë, duke mos pranuar të jenë mashtruar apo ndihmuar nga persona të tjerë. Rasti është regjistruar në fshatin Selcë e Poshtme të rrethit të Pogradecit, ku dy motrat B. Ç. dhe L. Ç., 16 dhe 14 vjeçe, si dhe një shoqja e tyre, 16 vjeçe, me inicialet A. B. janë zhdukur pa lënë gjurmë. Sipas të dhënave, vajzat ishin fqinje dhe mbrëmjen e së premtes dy motrat kishin shkuar te banesa e shoqes së tyre për të fjetur, pasi kishin marrë lejen e babait të tyre. Sakaq, ky i fundit në orët e para të mëngjesit ka shkuar për t'i parë, por nuk i ka gjetur atje. Menjëherë ka kontaktuar familjarët dhe të afërmit, por nuk ka mësuar gjë rreth tyre, çka e ka shtyrë të kërkojë ndihmën e policisë dhe të denoncojë zhdukjen e tyre. Sipas të dhënave nga banorët e fshatit, vajzat dyshohet të jenë larguar rreth orës 02: 00 të mëngjesit të së sh- tunës. Ata thanë se kanë dëgjuar një zhurmë makine, ndërsa babai i tyre ka shkuar në banesën e fqinjëve rreth orës 03: 00 të mëngjesit, por asnjëra prej tyre nuk gjendej në banesë. Vajzat e mitura kishin një marrëdhënie të ngushtë shoqërore me njëra- tjetrën, dhe shpesh shkonin të flinin te shoqja. Mësohet se kjo e fundit jetonte e vetme, pasi prindërit ndodheshin në emigracion, ndërsa për të kujdeseshin disa të afërm që banonin në fshat. Siç rrëfen babai i vajzave të mitura, i cili i ka rritur i vetëm pas divorcit, dy vajzat i kishin marrë leje për të fjetur te shtëpia e sho- qes së tyre dhe ai i kishte lejuar, ndërsa asnjëherë tjetër nuk ka ndodhur kjo gjë me vajzat e tij. "I kam rritur i vetëm vajzat, me shumë sakrifica dhe nuk dua t'u ndodhë asgjë e keqe. U dhashë leje të flinin në shtëpinë e shoqes si gjith- monë, pasi më vinte keq që edhe ajo ishte vetëm dhe mendoja se kalonin mirë së bashku, por gjithmonë i kontrolloja. U ngrita natën, sepse m'u duk sikur dëgjova zhurma dhe shkova të kontrolloj. Kontrollova si fillim shtëpinë, se thashë mos kishte hyrë njeri dhe pastaj shkova nga shtëpia ku ishin vajzat, por kur hyra atje, pashë se ato nuk ndodheshin dhe u alarmova", u shpreh babai Bashkim Ç. Ai hodhi dyshime se vajzat mund të ishin bërë pre e ndonjë mashtruesi apo trafikanti. Në orët e mbrëmjes, të tria vajzat u paraqiten në Komisariatin e Elbasanit, duke treguar se nuk kishin pasur persona të tjerë që i kanë shtyrë drejt këtij veprimi. Motivet e largimit pritet të zbardhen pas marrjes në pyetje nga Policia e Pogradecit.