Referendumi, i pamundur para zgjedhjeve të 2017

Kushtetuta nuk e lejon referendumin gjatë një viti elektoral

Kërkesa e mundshme e Partisë Demokratike për të nisur një referendum për të shfuqizuar ligjin e “menaxhimit të integruar të mbetjeve” nuk mund të shqyrtohet pas datës 23 dhjetor të këtij viti. Për të shfuqizuar ligjin e importit të mbetjeve, është nisur një procedurë në vitin 2013 nga shoqëria civile. Kjo kërkesë kaloi në Komisionin Qendror të Zgjedhjeve dhe në Gjykatën Kushtetuese, po ashtu u dekretua nga Presidenti në vitin 2013, por referendumi nuk u realizua sepse maxhoranca e majtë e ndaloi importin që në muajin shtator. Në nenin 151 të Kushtetutës thuhet se “Referendumi për të njëjtën çështje nuk mund të përsëritet përpara se të kenë kaluar tre vjet nga zhvillimi i tij”. Ndërkohë që me dekretin e Presidentit, data e referendumit për këtë ligj u caktua 22 dhjetori i vitit 2013. “Caktimin e datës 22 dhjetor 2013, për zhvillimin e referendumit të përgjithshëm me objekt shfuqizimin e nenit 22, pika 3, dhe nenit 49 të ligjit nr. 10463, datë 22.09.2011 “Për menaxhimin e integruar të mbetjeve”, thuhet në dekretin e kreut të shtetit. Por edhe nëse PD- ja e nis kërkesën për të çuar ligjin e importit të mbetjeve në referendum pas 23 dhjetorit, kjo kërkesë e ka të pamundur të kalojë për shqyrtim, pasi viti 2017 është vit elektoral. Në ligjin e referendumeve të lënë në fuqi në Kodin Zgjedhor të vitit 2003, theksohet se referendumet nuk mund të realizohen 6 muaj para zgjedhjeve të përgjithshme parlamentare. “Nuk mund të zhvillohet referendum kushtetues ose i përgjithshëm gjatë periudhës nga gjashtë muaj para përfundimit të mandatit të Kuvendit, deri në tre muaj pas mbledhjes së parë të Kuvendit të ri”, thuhet në nenin 119 të Kodit Zgjedhor. Sipas këtij përcaktimi ligjor, kërkesa për referendum mund të nisë vetëm në dhjetor të vitit 2017.