E arrestuara: E bëra për t'i tërhequr vëmendjen burrit
"E bëra sepse burri nuk më kushtonte më vëmendje. Kishim filluar të ftoheshim dhe doja që të shihja si do të reagonte, t'i tërhiqja vëmendjen". Ky ka qenë shpjegimi që 29- vjeçarja e arrestuar për kallëzim të rremë ka dhënë në polici për ngjarjen që sajoi. Burime nga Policia e Tiranës thanë dje se nga informacionet e marra sapo shërbimet e Komisariatit nr. 6 kanë mbërritur në vendngjarje është mësuar se bashkëshortët Indrit dhe Dalina Azuni prej disa kohësh nuk kishin marrëdhënie të mira me njëri- tjetrin. "Duke qenë përpara këtyre fakteve specialistët e Komisariatit nr. 6 kanë filluar hetimin në drejtim të një kallëzimi të rremë dhe nga ku kanë arritur të faktojnë se ngjarja ishte e sajuar", tha dje Policia. Burimet thanë se pas largimit të bashkëshortit të saj, 29-vjeçarja Dalina Azuni e ka fshehur në një dhomë të shtëpisë shumën e lekëve që pretendonte se ia kanë grabitur. Paratë u gjetën nga kontrollit të ushtruar nga oficerët e Policisë dhe më pas gjithçka është rrëfyer nga vetë "e dëmtuara". Ajo ka treguar se pasi ka fshehur paratë, që sipas saj janë kursime të familjes, ka hapur dritaren e banesës dhe ka lajmëruar familjarët, duke kërkuar ndihmë me zë të lartë dhe duke u thënë se dikush i kishte hyrë në banesë. Kur kanë shkuar familjarët e kanë konstatuar të lidhur. Policia tha se nga intervistomi paraprak Dalina Azuni ka pranuar se i ka bërë këto veprime vetëm për të tërhequr vëmendjen e të shoqit, pasi kishte vënë re që kohët e fundit nuk kishin komunikim dhe kishte mosmarrëveshje mes tyre.