Gjuha shqipe në arsim si lëndë me zgjedhje

Që nga viti i ardhshëm, gjuha shqipe do të jetë në programin arsimor si lëndë me zgjedhje në shkollat e Turqisë, sipas Anadolu Agency ( AA). Programi dhe materialet e lëndës së gjuhës shqipe, si dhe asaj boshnjake, që po ashtu do të futet në programim mësimor, do të përgatiten nga Universiteti i Trakya- s, ka deklaruar për agjencinë turke të lajmeve Drejtori i Përgjithshëm i Arsimit Bazë, në Ministrinë e Arsimit të Turqisë, Dr. Xhem Gençollu. Deklarata u bë në ceremoninë e nënshkrimit të protokollit. Gjuha shqipe do të hyjë në program që nga klasa e pestë. Gençollu ka sqaruar vendimin duke u shprehur se: “Ne gjuhën boshnjake dhe atë shqipe nuk e vërejmë si një gjuhë të huaj, por si një prej gjuhëve që vendosin lidhjet e qytetërimit tonë të përbashkët. Në Bosnje dhe Hercegovinë ndodhen gjashtë mijë nxënës boshnjakë që mësojnë turqisht, edhe ne themi që dhe fëmijët tanë të mund t’u shprehin atyre ‘ Dobri Dosli’. Shpresoj që edhe kjo nga pikëpamja jonë do të vlerësohet si një takim kulturor”. Ndërsa Rektori i Universitetit të Trakyas, Prof. Dr. Erhan Tabakollu, duke veçuar Ballkanin si pjesën kryesore të misionit dhe zgjerimit të tyre si universitet, ka vlerësuar se është krenari që universiteti i tyre do të përgatisë programet e këtyre mësimeve. Pas deklaratave ndodhi edhe nënshkrimi i protokollit nga Gençollu dhe Tabakollu. Sipas AA, në ceremoni kanë marrë pjesë zëvendësrektori i Universitetit të Trakya- s, Prof. Dr. Mumin Shahin, Dekani i Fakultetit të Lirësisë në Universitetin Trakya, Prof. Dr. Ilker Alp, drejtori i Drejtorisë Arsimore të qytetit Edirne, Hysein Ozxhan, dhe pedagogë të Shkollës së Gjuhëve të Huaja të Universitetit të Trakya- s.