Basha: S’ka skenar tjetër, PD do përballet në zgjedhje
Takimi me krerët e degëve: Deri më 15 shkurt, kandidatët
Kreu i opozitës, Lulzim Basha, deklaroi se opozita do të marrë pjesë në zgjedhjet parlamentare dhe do t’i fitojë ato.
Pas mbledhjes së kryesisë dhe Grupit Parlamentar, Basha u takua dje me drejtuesit e degëve të PD-së në rrethe. Sipas Bashës, opozita do të përballet me qeverinë në zgjedhjet e ardhshme dhe do të arrijë të dalë fituese. “Qeveria dhe mjetet e saj të propagandës janë lëshuar me klishetë: merr pjesë, nuk merr pjesë Partia Demokratike në zgjedhje. Partia Demokratike merr pjesë në zgjedhje dhe zgjedhjet do të jenë të lira e të ndershme. Nuk ka asnjë skenar tjetër. Ne do të luftojmë për zgjedhje të lira e të ndershme. Ne do të përballemi për zgjedhje të lira e të ndershme. Ne do të fitojmë me zgjedhje të lira e të ndershme”, deklaroi Basha. Gjatë takimit me krerët e PD- së në rrethe, Basha përcolli edhe një herë udhëzimin e tij për përzgjedhjen e kandidatëve që do të përfaqësojnë PD- në në zgjedhjet e ardhshme. Kreu i opozitës deklaroi se 15 shkurti do të jetë afati i fundit kur kandidaturat do të vijnë në PD, ndërkohë që më pas një komision i posaçëm do të merret me filtrimin e çdo emri. “Vlerat më të larta morale dhe shoqërore që kemi në komunitet do t’i konsiderojmë për të qenë përfaqësuesit më të denjë të Partisë Demokratike në Parlamentin e ardhshëm. Ne do t’u japim shqiptarëve një listë deputetësh, më përfaqësuesen dhe më cilësoren që ka pasur ndonjëherë ky vend”, u shpreh kreu i opozitës. Edhe dje Basha e cilësoi votimin dhe numërimin elektronik një kusht të patejkalueshëm për opozitën. Ky votim për Bashën do të siguronte garancinë e procesit dhe fundin e ndikimit të kriminelëve në proces. “Votimi dhe numërimi elektronik është fundi i kontestimit të zgjedhjeve mbi bazën e shitblerjes së votës, apo manipulimit të votës, apo futjes së duarve në kutitë e votimit. Votim elektronik do të thotë po kështu numërim elektronik. Merr fund armata e partiakëve dhe e kriminelëve që fut duart në kuti, që blen apo kërcënon numëruesit, që tjetërson vullnetin e qytetarëve, merr fund manipulimi i vullnetit të qytetarëve, siç votojnë qytetarët, ashtu del rezultati. Me votimin elektronik, me numërimin elektronik shqiptarët do të kenë zgjedhje të lira dhe të ndershme”, theksoi kreu i PD- së.