OSBE rrëzon votimin elektronik
“Kërkon shumë kohë, ne s’mund të këshillojmë të bëhet”
Ambasadori i OSBE- së në Tiranë, Bernd Borchardt, deklaron se nuk ka kohë për votimin dhe numërimin elektronik. Në një intervistë për “Vizion+”, ambasadori i OSBE- së thekson se një proces i tillë do të kërkojë kohë, ndaj edhe misioni i OSBE- së në Tiranë nuk do ta këshillojë realizimin e tij për kaq kohë sa ka ngelur. “Mbetet shumë pak kohë, për të mos thënë fare, për një reformë kuptimplotë dhe të hollësishme zgjedhore, që do të ishte në përputhje me rekomandimet e OSBE/ ODIHR- it, angazhimet e OSBE-së dhe standardet ndërkombëtare. Çdo ndryshim madhor i procedurave zgjedhore të zhvilluara prej një kohe të gjatë në një kontekst të caktuar zgjedhor kërkon kohë për t’u bërë e për t’u zbatuar siç duhet. Si shumë elemente të tjera të sistemit zgjedhor, përdorimi i votimit dhe numërimit elektronik dihet se ka avantazhe dhe disavantazhet e tij. Kjo kërkon shumë kohë dhe pa atë kohë, ne nuk mund të këshillojmë të bëhet një gjë e tillë”, shprehet ambasadori i OSBE- së. Sipas tij, propozimin për përdorimin e teknologjisë në zgjedhje e paraqiti edhe maxhoranca aktuale në kohën kur ishte në opozitë. Edhe atëherë përgjigjja e OSBE- së ka qenë e njëjtë kur u deklarua se duhet më shumë kohë për plotësimin e tyre. “Para zgjedhjeve të 2013- s, opozita e atëhershme, pra qeveria e tanishme, kërkoi futjen e votimit elektronik, po ashtu pak kohë para zgjedhjeve. OSBE-ja në atë kohë këshilloi se duhej më shumë kohë për përgatitje. Tani jemi në të njëjtën situatë dhe që prej tetorit 2016 kemi këshilluar, në të njëjtën linjë me këshillat tona të mëhershme, se votimi elek- tronik kërkon më shumë kohë sesa koha e mbetur. Sa për t’ju dhënë një shembull: dera hyrëse e zyrave tona të OSBE- së këtu në Tiranë është e mbrojtur me një sistem elektronik të kontrollit të hyrjeve. Dhe unë shoh përditë se sa të brishta mund të jenë sisteme të tilla. Kjo më bën shumë skeptik në lidhje me një sistem, i cili do të duhej të mbështetej në transmetimin e të dhënave nga zona të thella në serverët qendrorë në Tiranë, nëse kjo nuk bëhet me përgatitje dhe testime shumë të imtësishme”, shprehet ambasadori Borchardt.