Përgjigjet, Llallës i hiqet ekskluziviteti
Zyrtarët e lartë do përgjohen vetëm nga Byroja e Hetimit
Prokuroria e Përgjithshme nuk do të ketë më ekskluzivitetin e dhënies së lejes për të ushtruar përgjime të mjeteve të telekomunikacionit. Këtë kompetencë tashmë do ta ketë dhe Prokuroria e Posaçme Antikorrupsion dhe Byroja Kombëtare e Hetimit. Këto institucione të reja, që do të ngrihen në kuadër të Reformës në Drejtësi, do të kenë mundësi që, përveç ushtrimit të përgjimeve telefonike, të kryejnë edhe përgjime audio- video në ambiente publike dhe në ambiente private të zyrtarëve që do të hetohen. “Në projektligj saktësohet dhe kuptimi i termit ‘ objekt përgjimi’, që janë sinjalet, shkrimet, fotografitë, të dhënat audio- vizuale ose lloj tjetër informacioni, për të marrë ose transmetuar nëpërmjet pajisjeve së komunikimit elektronik, si dhe sjelljet dhe bisedat e kryera në vendet private dhe publike. Projektligji saktëson kuptimin e termit “Përgjim”, duke zgjeruar kuptimin e këtij termi jo vetëm me regjistrimin e përmbajtjes së komunikimit dhe të dhëna që lidhen me të, po edhe me videot e survejimit të fshehtë të mjediseve private dhe publike dhe dëgjimi e regjistrimi i fshehtë i bisedave në mjediset private dhe publike. Projektligji parashikon se të drejtën për të kryer përgjim e ka edhe Byroja Kombëtare e Hetimit”, thuhet në relacionin e projektligjit për përgjimet.
KËRKESA PËR PËRGJIM Kërkesat për të kryer përgjim, sipas projektligjit të ri, mund të miratohen vetëm nga kryetari apo zv. kryetari i Gjykatës së Lartë Antikorrupsion. “Projektligji me ndryshimet e propozuara përcakton procedurën për dhënien e të drejtës për përgjim, organet që kanë të drejtë të paraqesin kërkesën për përgjim, organi në të cilën drejtohet kërkesa, mënyrën e shqyrtimit të kërkesës. Kërkesën për përgjim, Prokuroria kompetente e paraqet te kryetari i Gjykatës së Posaçme të Apelit Kundër Korrupsionit dhe Krimit të Organizuar ose, në mungesë të tij, te zëvendëskryetari. Kryetari i Gjykatës së Posaçme të Apelit Kundër Korrupsionit dhe Krimit të Organizuar ose, në mungesë të tij, zëvendëskryetari, pas shqyrtimit të kërkesës me shkrim për përgjim, me vendim, miraton ose refuzon kërkesën për përgjimin e komunikimeve me anë të pajisjes elektronike të komunikimit, ose video- survejimit të fshehur të ambienteve publike dhe private”, thuhet në nismën e re të depozituar në Kuvend.