Virusi i gripit i merr jetën fëmijës 3 vjeç, shkon në 7 numri i viktimave
Tre persona të tjerë kanë ndërruar jetë nga virusi i gripit, mes të cilëve një fëmijë 3 vjeç. Sipas Ministrisë së Shëndetësisë, vogëlushi me inicialet B. Z., i lindur në Shënkoll të Lezhës, prej një jave ka pasur temperaturë, ethe dhe kollë. Pasi është paraqitur disa herë në urgjencën e spitalit të qytetit verior, fëmija i datëlindjes 06.05.2014 është shtruar në këtë spital me diagnozën “infeksion viral me insuficiencë respiratore”. Por, pavarësisht trajtimit spitalor, gjendja shëndetësore e vogëlushit ka mbetur e njëjtë, ndaj në këto kushte është parë e udhës dërgimi i tij në Pediatrinë e QSUT- së në Tiranë. “Më datë 15.01.2017 transferohet në Tiranë dhe shtrohet në Reanimacionin e Shërbimit të Pediatrisë në QSUT, ku ka pasur edhe shenja të tjera klinike si mosreagim ndaj dhimbjes, hipotoni muskulare, gjendje prekome, vështirësi në frymëmarrje dhe frymëmarrje të zhurmshme. Mostrat e marra për ekzaminim nga ISHP- ja konfirmojnë që pacienti ishte i prekur nga virusi i gripit stinor A. Edhe pas trajtimit në Reanimacionin e Shërbimit të Pediatrisë në QSUT, pacienti ndërron jetë në orët e para të mëngjesit të datës 17.01.2017”, është bërë me dije nga Ministria e Shëndetësisë. Po ashtu, mëngjesin e së martës është njoftuar edhe për ndarjen nga jetë të dy të moshuarave si pasojë e virusit të gripit, duke e çuar në 7 bilancin e viktimave të regjistruara në harkun e dy javëve të para të këtij muaji. Nga ekzaminimet e kryera, sipas Ministrisë së Shëndetësisë, ka rezultuar se të dyja pacientet, përveçse janë diagnostikuar me virusin AH3N2, kanë vuajtur edhe nga sëmundje të tjera bashkëshoqëruese, të cilat kanë sjellë përkeqësim të gjendjes, deri në fatalitet. Përkatësisht, pacientja me iniciale S. S., 82 vjeçe, banuese në Vlorë është shtruar fillimisht në shërbimin infektiv, dhe më tej në reanimacionin e këtij spitali me diagnozë, “insuficiencë multiorganore, postgjendjeje febrile”, ndërsa e sëmura me iniciale V. B., 71 vjeçe, banuese në Korçë, është shtruar në spital me diagnozën “insuficiencë multiorganore, meningoencefalit, sëmundje renale akute, pneumoni masive sinistra”.