Tre të rinj përplasen me policinë, dy të plagosur
Tre të rinj të përfshirë në një konflikt të ashpër fizik, janë përplasur edhe me forcat e rendit që kanë shkuar në vendngjarje të lajmëruar nga dëshmitarët. Dy persona kanë mbetur të plagosur, dy të tjerë kanë arritur të largohen, ndërsa njëri është vënë në pranga, edhe pse duke kundërshtuar me forcë shoqërimin e tij nga efektivët e rendit. Ngjarja ka ndodhur pak pas mesnatës së të hënës, në afërsi të një banke, pranë Unazës së Re në Tiranë. Gjithçka ka nisur pas fërkimit të dy makinave dhe më pas sherri është zhvendosur në rrugë, ku ka ndodhur përplasja fizike mes të rinjve. Tre personat që ndodheshin në njërin mjet, kanë rrahur duke përdorur shkopinj bejsbolli dhe përforcues grushti, dy personat që ndodheshin në mjetin tjetër. Madje, njëri prej tyre ka mbetur i plagosur rëndë dhe është dërguar për mjekim në Spitalin e Traumës, ku aktualisht ndodhet jashtë rrezikut për jetën. Ndërsa shoku i tij ka marrë disa plagë të lehta. Ngjarja që ka zgjatur disa minuta në rrugën "Lani Ligori", është denoncuar në Polici nga disa kalimtarë të rastit. Autorët e kësaj ngjarjeje, pavarësisht mbërritjes së policisë, kanë vijuar të ushtrojnë dhunë ndaj dy të dëmtuarve, madje janë konfrontuar fizikisht edhe me efektivët e rendit. Dy prej tyre, shtetasi Ndriçim Shima, 21 vjeç dhe 29-vjeçari me iniciale G. R. kanë arritur të largohen me vrap, duke u shpëtuar prangave. Ndërsa bashkëpunëtori i tyre, 27vjeçari Kreshnik Ferrollari, është ndaluar nga efektivët e Komisariatit nr. 6, megjithatë ka vijuar t'i kundërshtojë, duke dëmtuar edhe njërin prej mjeteve të Policisë që ndodhej në vendngjarje.