Padia e Ballës, pushon hetimi ndaj Malltezit
Akuza: Rrahja në aeroportin e Romës, ndiqet në gjykatë
TIRANE – Prokuroria heq dorë nga hetimi i çështjes së konfliktit fizik mes Taulant Ballës dhe Jamarbër Malltezit në një aeroport në Itali, vitin e kaluar. Sipas burimeve të Prokurorisë, shkak për pushimin e hetimeve ka qenë fakti se ngjarja nuk përben vepër penale, por është kundravajtje që ndiqet me të dëmtuar akuzues. Pra, më konkretisht, Prokuroria shpjegon në vendimin e pushimit, të cilin ia ka dërguar edhe deputetit Taulant Balla, edhe të akuzuarit Jamarbër Malltezi, se çështja penale mund të ndiqet direkt në gjykatë nga palët. Referuar Prokurorisë, i dëmtuari, në këtë rast deputeti i PS-së, Taulant Balla, mund të ngrejë padi në Gjykatën e Tiranës dhe të dorëzojë atje provat që ka për akuzën që bën ndaj Jamarbër Malltezit. Gjatë hetimeve që Prokuroria ka kryer paraprakisht është mësuar se shtetasi Jamarbër Malltezi e ka pranuar se e ka goditur deputetin socialist, pas një debati verbal që ata kanë pasur në aeroportin e Romës “Leonardo da Vinçi”. Malltezi, i cili është bashkëshorti i vajzës së ishkryeministrit Sali Berisha, ka pretenduar se deputeti i PSsë, Taulant Balla, i kishte fyer e ofenduar bashkëshorten e tij, Argitën, me pa të drejtë dhe në mënyrë të përsëritur. Pavarësisht deklarimit pranues të dhënë nga Jamarbër Malltezi në prokurori, organi i Akuzës ka vendosur pushimin e çështjes për faktin se ngjarja e ndodhur nuk mund të ndiqet penalisht. “Ngjarja që ka ndodhur plotëson përcaktimet ligjore të rrahjes dhe si e tillë ndiqet me padinë që i dëmtuari bën direkt në gjykatë ndaj të akuzuarit”, thanë burimet e Prokurorisë. Çështja penale filloi bazuar në një referim materiali hetimor nga Policia e Rinasit, ku Taulant Balla bëri kallëzim penal menjëherë pas kthimit nga Italia, më 25 qershor 2016. “Komisariati i Kufirit dhe Migracionit Rinas, më datë 25.06.2016, ka referuar materialet në Prokurorinë e Rrethit Gjyqë- sor Tiranë, për shtetasin Jamarbër Malltezi, vjeç 44, banues në Tiranë, pasi në tranzitin e aeroportit Romë ka goditur për shkak të detyrës deputetin e Kuvendit të Shqipërisë, Taulant Balla, vjeç 39, banues në Librazhd. Nenet 90 e 237 të Kodit Penal. Deputeti Taulant Balla është paraqitur në PKK Rinas, ku ka bërë kallëzim në lidhje me këtë ngjarje”, theksohej në komunikatën e Policisë dhe në referimin e saj drejtuar Prokurorisë së Tiranës në lidhje me ngjarjen. Pas kallëzimit të bërë nga Taulant Balla, Policia kishte pyetur për rreth 30 minuta edhe bashkëshortët Jamarbër e Argita Malltezi në momentin e kthimit të tyre në Shqipëri. Ata kishin thënë se ishin provokuar nga deputeti socialist. Pas pushimit të hetimeve nga ana e Prokurorisë, duket se Taulant Balla e ka humbur afatin ligjor për ta ndjekur vetë çështjen në gjykatë si i dëmtuar akuzues.