Zbulohet një agjente ruse me mision në Kosovë
Agjencia e Kosovës për Inteligjencën ka siguruar të dhëna të bëra publike në fund të vitit 2016, se në Kosovë ka një rrjet bashkëpunëtorësh të shërbimeve të Inteligjencës së Federatës Ruse, të cilët udhëhiqen nga Dragana Trifkoviçi. Ajo dyshohet se është agjente e nivelit të lartë. Trifkoviçi është drejtoreshë e Qendrës për Studime Gjeostrategjike dhe njëkohësisht vepron edhe në kuadër të Qendrës Euroaziatike për Hulumtim dhe Zhvillim. Njëkohësisht, ajo ka qenë edhe një nga figurat e larta të Partisë Demokratike të Serbisë të themeluar nga Vojisllav Koshtunica. Në kuadër të veprimtarisë së saj kundër Republikës së Kosovës, Trifkoviç ka rrjet shumë të gjerë bashkëpunëtorësh, të cilët veprojnë jo vetëm në Kosovë e Serbi, por edhe në shumë shtete perëndimore. Ajo është ndër kultivueset më të mëdha të propagandës, që ka për qëllim diskriminimin e shqiptarëve në përgjithësi, duke e shtrirë rrjetin në media e politikanë që nga Moska e deri në Berlin, Paris, Romë e Bruksel. AKI ka evidentuar raste kur ajo e ka vizituar Kosovën, por në të gjitha rastet asnjëherë nuk është regjistruar në kufi. Sipas konstatimeve, Trifkoviç dëmin më të madh Kosovës ia bën duke rekrutuar serbë të Kosovës nëpër seminare e takime të ndryshme që i organizojnë institutet e ndryshme ruse në Serbi. Dyshohet se ajo mund të ketë rekrutuar njerëz të strukturave të larta të Listës Srpska, të cilët janë përfaqësues në institucionet e Republikës së Kosovës. AKI ka në dispozicion prova, të cilat e rrisin dyshimin e bazuar se ajo është pjesë e shërbimeve ruse të Inteligjencës.