Balla: Protestojnë kundër varfërisë me pica dhe valle
Deputeti socialist Taulant Balla akuzoi opozitën se ka humbur kauzën e saj të protestës. Në një konferencë nga Kryesia e Kuvendit, Balla tha: “Protesta e opozitës u mblodh për zgjedhje të lira. Sot e harruan kauzën, protestojnë për qeveri imagjinare. Më 18 qershor qytetarët do thirren për të votuar. PS është e bindur se do rikonfirmohet në zgjedhje si forcë e parë”. Balla nuk kurseu as ironinë për mënyrën e të protestuarit nga opozita. “Të protestosh kundër varfërisë, por të hash pica e të hedhësh valle nuk ka sens”. Nënkryetari i Grupit Parlamentar Socialist tha se pa veting dhe Reformë në Drejtësi vendi nuk mund të ecë përpara në procesin e integrimit në BE. “Ata drejtues të PD që e kanë lidhur avenirin e tyre kundër Reformës në Drejtësi duhet të kuptojnë se po punojnë kundër reformave. Parlamenti po punon normalisht me Komisione. Grupi Parlamentar i PD, një pjesë e deputetëve të PD nuk janë dhe nuk duan që të jenë pjesë e funksionimit normal të Parlamentit në këto javë ku pritet të ngrihen Komisionet e Posaçme në kuadër të funksionimit dhe implementimit të plotë të procesit të vetingut. E kemi thënë këtë, sikurse i njëjti lajm është paralajmëruar një muaj më parë, kur opozita, PD filloi bojkotimin e Reformës Zgjedhore. Në atë kohë protesta u thirr pikërisht gjoja për Reformën Zgjedhore, numërimin dhe votimin tërësor elektronik. Sot nuk flasin fare për këto dy çështje, sot flasin vetëm për largim qeverie dhe lloj qeverirash teknike që nuk kanë të bëjnë fare me modelin e funksionimit të demokracisë që kemi zgjedhur në Shqipëri”.