Llalla në Shkodër: Vetingu, jo për t’iu imponuar prokurorëve

SHKODER – Prokurori i Përgjithshëm, Adriatik Llalla, kërkoi dje nga Shkodra që procesi i vetingut të mos përdoret për të kontrolluar vendimmarrjet e prokurorëve. Deklaratën kreu i organit të akuzës e bëri gjatë analizës së punës 1- vjeçare të Prokurorisë së Shkodrës. “Procesi i vetingut është një moment tepër i rëndësishëm në punën tonë dhe nuk mund të përdoret nga askush si mënyrë për t’iu imponuar prokurorëve në vendimmarrjet e tyre. Të gjithë duhet të jemi të pavarur në vendimmarrjet që kemi, vendimmarrje që duhet të jenë të bazuara në ligj dhe në prova”, u shpreh kryeprokurori. “Analiza vjetore e këtij viti përkon me periudhën në të cilën tashmë kalon sistemi i drejtësisë në Shqipëri, atë të zbatimit të Reformës në Drejtësi. Një moment tepër i rëndësishëm për mënyrën e organizimit dhe funksionimit të institucionit të Prokurorisë. Tashmë kjo reformë ka mjaft risi të reja për mënyrën se si ligjvënësi ka vlerësuar të funksionojë institucioni i Prokurorisë. Paraprakisht është vlerësuar që të gjithë ne të kalojmë procesin e vetingut, proces i cili pritet të fillojë së shpejti me krijimin e strukturës së posaçme për zgjedhjen e personave, të cilët do të jenë pjesë e këtij organizimi”, tha Llalla. Sipas tij, një risi tepër e rëndësishme është edhe ajo e decentralizimit të institucionit të Prokurorisë. “Ligjvënësi ka vlerësuar që institucioni i Prokurorisë të mos funksionojë më siç ka funksionuar deri tani në mënyrë të centralizuar, por të fillojë implementimi i sistemit të ri, decentralizimit të Prokurorisë. Për këtë qëllim është vlerësuar që paraprakisht të gjithë çështjet të përzgjidhen nëpërmjet shortit, proces që ka filluar në mjaft prokurori të vendit dhe pritet që edhe në Shkodër të fillojë në fillimin e muajit mars”, nënvizoi Llalla para vartësve. Ai theksoi se nëpërmjet kësaj forme synohet që prokurorët jo vetëm të jenë të pavarur në vendimmarrjet e tyre, por njëherazi të jenë edhe përgjegjës në këto vendimmarrje. “Deri në krijimin e Këshillit të Lartë të Prokurorisë dhe krijimin e strukturës së posaçme pranë këtij këshilli, inspektimi do vijojë të kryhet nga Prokuroria e Përgjithshme, proces i cili vijon të kryhet normalisht në të gjitha rastet që ka pasur nevojë”. s. n