Rama darkë me Metën, Basha: T’i thërrasë mendjes
“Ose do pranojmë të shkatërrojmë zgjedhjet e lira, ose të qëndrojmë derisa të largojmë qeverinë”
Kryetari i opozitës, Lulzim Basha, ka paralajmëruar Kryeministrin Edi Rama që t’i thërrasë mendjes dhe të dëgjojë zërin e qytetarëve, në të kundërt bulevardi “Dëshmorët e Kombit” do të mbushet me dyfishin e protestuesve të 18 shkurtit.
Kreu i demokratëve këtë deklaratë të fortë e bëri dje gjatë takimit me vajzat dhe gratë në çadrën e protestës, ku u diskutua rreth problematikave të familjes. “Kryeministri t’i thërrasë mendjes, ta dëgjojnë zërin e qytetarëve, të mos i bëjnë hesapet gabim, përndryshe sheshi i 18 shkurtit do të mbushet 2 herë më shumë dhe nuk do të ketë njeri ta ndalë këtë valë popullore”, ka thënë dje Basha. Për kryedemokratin, zgjidhjet për mundimet e ankthin e grave dhe nënave vijnë përmes zgjedhjeve të lira e të ndershme. “Zgjedhje të lira e të ndershme mund dhe do të ketë vetëm pa qeverinë e lidhur me krimin, pa qeverinë që kriminalizoi parlamentin, qeverinë që përbuzi dhe hodhi në rrugë edhe gratë socialiste për t’u hapur vend trafikantëve të grave, siç ishte rasti në Lezhë, për t’u hapur rrugë dhunuesve të grave, siç janë qindra e mijëra raste në administratën shtetërore”, ka thënë ai. Lulzim Basha theksoi edhe një herë rëndësinë e mesazhit të dhënë më 18 shkurt në nisjen e protestës qytetare. “Nëse ka një mision të shenjtë, për të cilin ia vlen të sakrifikojmë e të qëndrojmë deri në fitore është siguria, liria, mirëqenia e brezave që do vijnë. Ndaj, qëndresa jonë këtu sot, nesër e deri në arritjen e fitores sonë, është garancia, është domosdoshmëria, është vendimi që do t’i shkojmë deri në fund të gjithë së bashku këtu”, ka thënë ai. E pranishme në bashkëbisedim ishte edhe bashkëshortja e Bashës, Aurela Basha, e cila u bëri thirrje të gjitha nënave të mos pranojnë asgjë më pak se standardet europiane. “Është detyra jonë që sot të bëjmë ne sakrificën tonë. Tani që ne dimë më mirë, kemi parë më shumë, është detyra jonë që të qëndrojmë këtu në këtë shesh e të mos pranojmë asgjë më pak se standardet europiane” tha zonja Basha. LIRIA E MEDIAVE Më herët, gjatë mesditës në çadrën e “lirisë”, siç e kanë quajtur demokratët, është zhvilluar një tryezë edhe me përfaqësues të medias. Edhe në këtë takim, Lulzim Basha foli për kushtin e vetëm që ka opozita, atë të largimit të kryeministrit dhe krijimit të një qeverie teknike për realizimin e zgjedhjeve. “Jemi këtu dhe do të jemi këtu çdo ditë e më shumë, çdo ditë e më të vendosur deri në realizimin e plotë, jo të pjesshëm, por të plotë të kushtit tonë: Zgjedhje të lira dhe të ndershme, largimin e këtij kryeministri dhe një qeveri teknike që garanton votën e lirë të qytetarëve shqiptarë. Dy rrugë ka: ose do të pranojmë të shkatërrojmë, ta lëmë të bjerë edhe ky institucion, zgjedhjet e lira dhe të ndershme, ose së bashku të qëndrojmë këtu derisa të largojmë qeverinë, derisa të largojmë burimin e problemit dhe së bashku të japim zgjidhjen që meritojnë shqiptarët”, ka thënë Basha.