Vrasja në Belgjikë, Prokuroria kërkon 16 vjet burg për Marinajn
TIRANE - Prokuroria kërkoi dje një dënim me 16 vjet heqje lirie për Kristian Marinajn, i akuzuar si bashkëpunëtor i ish- deputetit Mark Frroku në vrasjen e Aleksandër Kurtit në vitin 1999 në Belgjikë. Sipas Prokurorisë, nga provat e paraqitura në gjykim ka rezultuar i provuar fakti se i pandehuri Marinaj është një nga autorët e ngjarjes dhe se ai duhet të deklarohet i fajshëm për akuzën e "vrasjes me dashje", kryer në bashkëpunim. Marinaj u gjykua në mungesë, në një proces të veçuar nga ai i ish- deputetit Frroku. Përveç emrit Kristian Marinaj ( Morina), i pandehuri njihet edhe me emrat Arjan Bytyci, Hilë Joka dhe Hilë Morina. Burime brenda seancës, ku nuk u lejua prania e gazetarëve, bënë me dije se prokuroria e mbështeti akuzën në prova të përcjella në rrugë ligjore nga ana e autoriteteve belge të drejtësisë. Mes këtyre provave janë edhe deklarimet e dy oficerëve të Policisë belge, të cilët bazohen në dëshmi të dhëna nga dëshmitarë anonimë. Aleksandër Kurti u vra me thikë më 5 mars 1999 në një rrugë në hyrje të stacionit "Gare du Midi", Nr. 47A të Avenue Fonsny, Bruksel. Sipas hetimeve, autorët e vrasjes së tij ishin persona të përfshirë në rrjetin e shfrytëzimit të prostitucionit në Belgjikë. Ai është hequr si polic i Interpolit dhe se në Shqipëri e njeh familjen e prostitutës "L". Nga frika se mos familja e saj mësonte mbi punën që ajo bënte në Belgjikë, shtetasja "L" i telefonon tutorit dhe më pas i kanë ngritur një kurth Kurtit, ku ai u qëllua me thika. Ndaj Marinajt ekziston një masë "arrest në burg" në mungesë, dhënë nga Gjykata e Lartë, në qershor 2015. Më herët ndaj tij ka pasur disa urdhra kërkimi ndërkombëtar nga Interpol Brukseli, të cilët kanë rënë për shkak të identiteteve të ndryshme me të cilat rezultonte i dyshuari. Po dje në Gjykatën e Tiranës pritej të dëgjoheshin konkluzionet përfundimtare të Prokurorisë edhe në procesin gjyqësor në ngarkim të Frrokut. Përveç akuzës për "vrasje" në Belgjikë, ai akuzohet edhe për "mosdeklarim të pasurisë", "pastrim parash" dhe "ndërtim të paligjshëm". Seanca ndaj tij nuk u zhvillua për shkak të mungesës në sallën e gjyqit të prokurorëve, të cilët ishin paralelisht në seancën tjetër në ngarkim të Kristian Marinajt. Në sallë munguan edhe avokatët e Frrokut, si edhe vetë ish- deputeti. Në këto kushte, gjykata e shtyu seancën ku do të lexohet pretenca e prokurorisë për ishdeputetin më 28 shkurt 2017.