Rrëzohet palma e tharë në bulevard, dëmtohet një makinë
Dëshmitari: Bashkia t’i presë. Janë rrezik për jetën e banorëve, sidomos të fëmijëve
Palmat e thara në bulevardin e Vlorës rrezikojnë jetën e qytetarëve. Krejt papritur, dje trungu i një palme është thyer duke i rënë përsipër një makine të parkuar.
Fatmirësisht, në mjet nuk ka pasur persona dhe për rrjedhojë nuk pati të lënduar. Ky është rasti i tretë që palmat rrëzohen përgjatë bulevardit, duke vënë kështu në rrezik jetën e kalimtarëve. Ngjarja e djeshme ndodhi në orët e mesditës, kur në bulevard kalojnë qindra qytetarë. Dëmtimet në makinën që ndodhej e parkuar kanë qenë të konsiderueshme. Nga ajo që u konstatua, është thyer xhami dhe dëmtime të tjera në pjesën e prapme të automjetit, me targa AA 408 BM. “Ishim me fat, pasi pema u shkëput krejt papritur, duke rënë mbi makinë e më pas në tokë. Ne ishim vetëm pak metra më tutje. Po kthehesha nga një shëtitje në Lungomare, kur u ndeshëm me shkëputjen e pemës. Bashkia duhet të marrë masa dhe t’i presë këto palma të thara, pasi rrezikohet jeta e qytetarëve. Sot ne shpëtuam, por nesër mund të bëhet një fëmijë viktimë e kësaj pa- përgjegjshmërie”, u shpreh një i moshuar, i cili ishte dëshmitar i ngjarjes së djeshme. Kryetari i Bashkisë, para afro 1 viti ndërmori një nismë për zëvendësimin e palmave me pemë të tjera. Disa prej tyre janë zëvendësuar, por të shumtat kanë mbetur të thara, ku veç pamjes së shëmtuar, janë kthyer në rrezik për qytetarët. Të pyetur për këtë problematikë, burime nga Bashkia e Vlorës shprehen se shumë shpejt do të nisë një projekt për shkuljen e palmave. Por pritet një makineri që t’i shkulë me rrënjë, pa përdorur sharra apo mjete të tjera. Tharja e palmave në Vlorë u shkaktua nga një lloj buburreci që përhapej me shpejtësi dhe nuk u gjet preparati që i luftonte ato. Janë rreth 350 palma të një moshe më shumë se 30vjeçare të mbjella në vitin 1987 në bulevardin VlorëSkelë, të cilat u thanë në një kohë mjaft të shpejtë.