Fituesit, Ministria e Kulturës mbështet 127 projekte
Janë plot 127 projekte kulturore që do të mbështeten financiarisht, në mënyrë të pjesshme nga buxheti i shtetit. Ministria e Kulturës shpalli dje listën e fituesve. Duke parë ndër fitues vihet re se do të kemi sërish shumë festivale komedish, monodramash, filmi, kulinarie, kënge për fëmijë, me muzikë baroke, për zërat lirikë, konkurs fotografie etj. Do të ketë shumë programe për librin, festivale, lexime etj. Mbështeten vënia në skenë e projekteve teatrore, botime librash, net koncertore, ekspozita etj. Kjo është hera e katërt që Ministria e Kulturës procedon për financimin e projekteve kulturore përmes një thirrjeje të hapur, por përtej numrit të aktiviteteve nuk është bërë ndonjë bilanc se sa këto aktivitete të mbështetura nga MK janë realizuar dhe sa shkojnë ato te publiku, çfarë impakti kanë te ky i fundit, sa i shërbejnë “edukimit përmes kulturës”. A ka një mekanizëm matës apo supervizues nga ana e Ministrisë së Kulturës, me qëllim që edhe ato financime, sado të pakta të jenë në sasi, të shkojnë për produktin dhe te publiku.
Ministria e Kulturës, më 1 dhjetor 2016, shpalli thirrjen për projekt- propozime për vitin 2017 në art dhe kulturë, e cila u mbyll në datë 13 janar 2017. Sipas një njoftimi të Min- istrisë së Kulturës, kolegjiumi i MK mori në shqyrtim rreth 230 projekt- propozime në art, kulturë dhe trashëgimi kulturore, nga të cilat përzgjodhi 127 projekte fituese. Edhe në këtë thirrje, ashtu si në vitin e kaluar, ka ardhur në rritje interesi i aplikantëve me propozime, ide dhe projekte të subjekteve, organizatave, apo shoqatave kulturore. “Kolegjiumi i përbërë me ekspertë të vlerësimit dhe zhvillimit të politikave dhe strategjisë kulturore vlerësoi fituese projekt- propozimet, që përputhen me kriteret e shpallura në udhëzuesin që shoqëroi thirrjen për projekt- propozime, projektet që shprehin: ide novatore, garantojnë cilësi dhe profesionalizëm në realizim, qëndrueshmëri dhe vazhdimësi, mundësi për rritjen profesionale të artistit, sjellin zhvillim dhe gjallërim të skenës artistike e kulturore në Shqipëri, dëshmojnë respektimin e të drejtës së autorit. Veçojmë edukimin përmes artit dhe kulturës, krijimtarinë artistike dhe përkrahjen e të rinjve, duke filluar nga potenciali i tyre krijues e deri te punësimi i tyre, rritjen e audiencave, shtrirjen gjeografike dhe kohore, si dhe aftësia për të thithur fonde nga burime të tjera”, njofton Ministria e Kulturës. Mësohet se projektet e përzgjedhura do të mbështeten në mënyrë të pjesshme.