PS, kongres programor më 29 prill për zgjedhjet
Ka nisur dje trajnimi i rreth 6500 punonjësve të Policisë së Shtetit për procesin zgjedhor. Në praninë e ambasadorit të OSBE- së në Tiranë, kreut të KQZ- së dhe drejtorit të Përgjithshëm të Policisë, ka nisur trajnimi mbi detyrat dhe rolin e Policisë së Shtetit gjatë procesit zgjedhor 2017. “Qytetarët i kanë sytë nga ju, nga policia e tyre, dhe ju respektojnë sepse jeni të ndershëm, të paanshëm dhe jeni të gatshëm për të dhënë ndihmë kur ju nevojitet”, është shprehur ambasadori Borchardt. Nga ana tjetër, ai ka kërkuar nga drejtuesit e Policisë se, pavarësisht procesit zgjedhor, Policia duhet të mos harrojë luftën antikanabis dhe çështje të tjera me rëndësi për vendin. Drejtori i Përgjithshëm i Policisë, Haki Çako, ka siguruar partnerët dhe aktorët e këtij procesi se Policia e Shtetit nuk është dhe nuk do të jetë në asnjë rast e politizuar.
Partia Socialiste do të zhvillojë kongresin e saj programor më 29 prill, ndërsa asambleja kombëtare e saj do të mblidhet më 2 prill. Vendimi u mor dje nga kryesia e PS- së, që u mblodh dje paradite nën drejtimin e kreut të PS- së, Edi Rama. Më 1 prill mbushen katër vjet nga arritja e marrëveshjes mes Partisë Socialiste dhe Lëvizjes Socialiste për Integrim në 2013 e pritet që deri atëherë, LSI të jetë shprehur për qëndrimin e saj parazgjedhor, nëse do të dalë më vete apo në koalicion me PS. Kongresi i prillit do të bëjë bilancin 4- vjeçar të qeverisjes aktuale, do të vlerësojë ecurinë e koalicionit me Lëvizjen Socialiste për Integrim dhe do të diskutojë dhe miratojë programin elektoral të Partisë Socialiste për zgjedhjet. Mësohet se delegatët e kongresit do të njihen dhe me listën e kandidatëve për deputetë të PS, të cilët një ditë më vonë duhet të depozitohen në Komisionin Qendror të Zgjedhjeve. Gjatë mbledhjes së kryesisë, kreu i PS- së ka komentuar edhe qëndrimin e presidentit Nishani për kandidaturën e Fatmir Xhafajt. “Kandidatura e Fatmir Xhafajt për ministër të Brendshëm gëzon mbështetje të plotë të partnerëve strategjikë të Shqipërisë, të cilët punuan nga afër me Fatmirin për Reformën në Drejtësi”, mësohet të jetë shprehur Rama.