Call Center në Tatime, Ahmetaj: Biznesi, mundësi për vetëkorrigjim
Të gjitha bizneset do të njoftohen nëpërmjet shërbimit Call Center për pagesat e taksave, vetëkorrigjimit apo dorëzimit të pasqyrave financiare. Ministri i Financave, Arben Ahmetaj, dhe drejtoresha e Përgjithshme e Tatimeve, Vasilika Vjero, zhvilluan dje një vizitë në zyrat e shërbimit të tatimpaguesve për promovimin e Qendrës së Thirrjeve ( Call Center) për tatimpaguesit, shërbimi më i ri në ndihmë të sipërmarrjes. Ministri Ahmetaj u shpreh se ky shërbim i ri për tatimpaguesit është një tjetër nismë në vazhdën e punës së nisur me thjeshtimin e procedurave tatimore në kuadër të fazës së dytë e të tretë të luftës kundër informalitetit, e fokusuar tashmë te komunikimi i përditshëm, intensiv, me sipërmarrjen me qëllim nxitjen e pajtueshmërisë me ligjin dhe vetëkorrigjimin. “Call Center për tatimpaguesit është një shërbim në funksion të lehtësimit të procedurave tatimore. Është një risi në shërbimin që ofron Drejtoria e Përgjithshme e Tatimeve dhe funksionon në dy mënyra kryesore. Pikë së pari, këtu operatorët dhe specialistët informojnë sipërmarrjen për të gjitha problematikat që mund të dalin gjatë punës së përditshme, pra, lehtëson procedurën nëpërmjet punës nga zyra dhe komunikimit nga zyra me sipërmarrjen. Në të njëjtën kohë, sipërmarrja ka mundësinë të pyesë specialistët e shërbimit të tatimpaguesve online, për të marrë përgjigjet e duhura në kohë reale, apo për t’u orientuar në Drejtoritë Rajonale për çështje specifike që kanë nevojë për këshillim apo për orientim. Frytet e para të punës duken qartë, vetëm në shkurt janë njoftuar nga kjo qendër 25 mijë tatimpagues të biznesit të vogël dhe reagimi ka qenë jashtëzakonisht shumë pozitiv. Ne besojmë që nëpërmjet komunikimit të rrisin vullnetarizmin në pagesa dhe qartësimin e të gjithë procedurave”, tha ministri Ahmetaj.