Pallati me leje false, xhenierët nisin punën
VLORE/ Hapen vrimat për tritolin, rrezik për objektet përreth
VLORE - Pallati i projektuar për 13 kate në bulevardin kryesor të Vlorës do të rrafshohet brenda pak ditësh. Inspektorë të IKMT- së mbërritën dje nga Tirana bashkë me forcat xheniere të ushtrisë, të cilët nisën punën për hapjen e vrimave në kolonat e pallatit ku do të vendoset lënda shpërthyese tritol. Forcat xheniere kanë hasur në mjaft vështirësi për shkak të konstruktit të fortë të pallatit që ishte parashikuar në shumë kate në zemër të qytetit të Vlorës. Pallati karabina i ndërtuar vetëm në pesë kate, për shkak të pezullimit të punimeve nga Prokuroria e Gjykata, ndodhet në bulevardin qendror Vlorë- Skelë, në afërsi të teatrit "Petro Marko", në vendin e quajtur "Tri Racat". Gjatë ditëve të fundit ka pasur edhe probleme të lidhura me kundërshtimet e pronarëve të objektit, të cilët nuk lejonin vijimin e punës. Ata kërkonin një shkresë zyrtare nga IKMT- ja për shembjen e objektit dhe shpronësimin e tyre. Me një vendim të Këshillit të Ministrave, tashmë zyrtarisht është vendosur edhe shpronësimi i pronarëve, i cili shkon në vlerën e rreth 81 mil- ionë lekëve të rinj. Ky vendim solli edhe tërheqjen e pronarëve nga pretendimet e tyre. Vendimi për shpronësim i ka hapur tashmë rrugë vijimit të punës për shembjen e pallatit, ndërsa IKMT- ja konfirmon se për shkak të objekteve që gjenden ngjitur tij, ka mjaft rrezik. Ndaj po studiohet gjithçka deri në detaje për të bërë të mundur që shembja e kontrolluar të kryhet pa dëmtuar objektet përreth. Pritet që shembja e pallatit të kryhet jo më shpejt se java e ardhshme. Leja e ndërtimit është dhënë në vitin 2010, por nga Prokuroria rezultoi se leja ishte false dhe nuk kishte kaluar në mbledhjen e KRRT- së së Bashkisë së Vlorës. Për këtë shkak, në vitin 2013, është vënë nën akuzë për falsifikim edhe kryebashkiaku i asaj kohe, Shpëtim Gjika, ndërsa me urdhër të Prokurorisë dhe vendim të Gjykatës, punimet për ndërtimin u pezulluan.