Sulm para Parlamentit britanik, katër të vrarë
Eliminohet nga policët agresori Abu Izzadeen, mendohet se kryeson listën e personave më të rrezikshëm në Britani
Fiks një vit pas sulmit terrorist në Bruksel, një tjetër ngjarje godet në zemër të Europës, në Londër.
Tre persona dhe një terrorist mbetën të vdekur pas masakrës së një agresori, i identifikuar si Abu Izzadeen, pjesë e organizatës terroriste "Al Ghurabaa", në urën "Westminister" të Londrës dhe përpara Parlamentit. Ngjarja u shënua pasditen e djeshme, kur një makinë u pa mbi urën "Westminister" teksa lëvizte në mënyrë të çoroditur mes njerëzve, për t'iu drejtuar më pas godinës së Parlamentit, në përpjekje për të hyrë në ndërtesë deri në momentin që sulmuesi u qëllua nga policia londineze. Sipas "The Indipendent", subjekt i sulmit mendohet të ketë qenë Kryeministrja Theresa May, e cila thuhet të ketë qenë vetëm 40 metra larg vendngjarjes, përpara se të evakuohej. Sakaq, Dhoma e përfaqësuesve pezulloi në moment seancën, ndërsa ligjvënësve iu kërkua të qëndrojnë brenda Parlamentit. Sulmi i një dite më parë, ku veç agresorit mbeti i vrarë një polic dhe dy persona të tjerë u shtypën me makinë, është i fundit nga një varg incidentesh të ngjashme në të gjithë botën, ku ekstremistët kanë përdorur armë të ftohta dhe automjete për të vrarë sa më shumë njerëz. Britania ndodhet në gjendje alarmi, të dytin më të rëndë pas ngjarjes së korrikut të vitit 2005, ku katër islamikë vranë 52 persona në një sulm vetëvrasës në metronë e Londrës, në atë që u quajt sulmi më i rëndë në kohë paqeje.
DËSHMITË
Agresori thuhet të ketë qenë i vetëm teksa drejtonte automjetin 4X4 në urën "Westminister", duke lënë të plagosur më shumë se 20 persona, mes të cilëve nxënës francezë. "Ne po fotografonim ' Big Ben', kur pamë shumë njerëz të vraponin drejt nesh e më pas një aziatik, rreth të 40-ave, që mbante një thikë të gjatë në dorë. Më pas dëgjuam tri të shtëna. Pasi kaluam rrugën, burri ishte shtrirë në tokë, i mbuluar në gjak", deklaroi një nga dëshmitarët okularë, Jayne Wilikson. Sakaq, një tjetër person i ndodhur aty vetëm disa sekonda më përpara, thotë se kishte parë njerëz të fluturonin në ajër, teksa terroristi i godiste me makinë. "Pashë një automjet të zi me shpejtësi duke shkuar drejt këmbësorëve që ndodheshin në urë. Kam parë shumë njerëz në ajër. Menjëherë mendja më shkoi për një sulm terrorist", thotë një dëshmitare okulare, Bernadette Kerrigan. Teksa ne po ecnim mbi urë, pamë njerëz të shtrirë në tokë. Pa dyshim, ishin të plagosur. Më pas erdhi shërbimi emergjent. Të gjithë po vraponin". Zyrtari i Ministrisë së Jashtme, Tobias Ell- wood, ishte në mesin e atyre që nxituan për të ndihmuar policin e qëlluar me thikë. Ky i fundit mësohet të ketë humbur të vëllain gjatë bombardimeve në Bali.
NGJASHMËRIA E HABITSHME
Sulmi i djeshëm terrorist ka një ngjashmëri të habitshme me atë të Kanadasë, në tetor të vitit 2014. Në këtë incident është përdorur gjithashtu një makinë në një sulm ndaj policëve dhe u parapri degradimi i situatës për shkak të ndërhyrjes së shpejtë. Në sulmin e parë, një person i armatosur, i identifikuar si Michael Zehaf Bibeau, qëlloi një punonjës sigurie para ndërtesës së Parlamentit në Otavë, më pas u fut në makinë në drejtim të tij. Niveli zyrtar i kërcënimit nga terrorizmi ndërkombëtar raportohet të jetë në nivel shumë të rëndë, duke nënkuptuar se sulme të ngjashme janë të mundshme të ndodhin, një situatë që vijon prej më shumë se dy vitesh. Ngjarja dramatike vjen pak javë pasi u zbulua se shërbimet e sigurimit në Mbretërinë e Bashkuar kanë dekonspiruar planin për 13 sulme të mundshme terroriste në më pak se 4 vjet. Zëdhënësja e liberal- demokratëve, baronesha Randerson, tha se vendet janë veçuar në bazë të besimeve fetare. "Sigurisht që niveli i sigurisë duhet të jetë i lartë në çdo kohë, por kjo ngjarje duhet të shpjegohet me detaje".