Helmimi në tubimin e PD, Berisha: Një javë më parë u bë stërvitje nga policia
Ish- kryeministri Sali Berisha ka kërkuar nga Prokuroria të hetojë me përparësi ngjarjen e helmimit me lëndë kimike të pjesëmarrësve në tubimin hapës të fushatës së PD, përfshirë edhe kryetarin Basha. Sipas Berishës, nuk ka asnjë dyshim që ajo që ndodhi ishte një agresion akut. “Shfaqjet klinike të personave të dëmtuar nga agjenti toksik ishin qartësisht ato të veprimit akut irritues duke shkaktuar eriteme të fortë, skuqje dhe djegie të lëkurës, skuqje e fryrje dhe djegie të qepallave dhe syve, irritime të kornes dhe perde e përkohshme në shikim, dhimbje të padurueshme koke, irritim të fortë dhe sekrecione të mukozave të hundës dhe rrugëve të frymëmarrjes. Jashtë çdo lloj dyshimi, ky ishte një agresion akut”, shprehet Berisha. Ish- kryeministri merr në analizë të gjithë situatën dhe reagimet e ndodhura pas ngjarjes së helmimit të protestuesve. “Kemi të bëjmë me një qëndrim të dyshimtë të papranueshëm të qeverisë ndaj këtij sulmi kimik kundër opozitës në mitingun e saj elektoral, për të cilin edhe sot, pas pesë ditësh, nuk dihet asgjë për sh- kakun dhe qeveria refuzon ta cilësojë ashtu siç ishte në të vërtetë. Ky sulm kimik, si rastësisht ndodhi vetëm një javë pas një stërvitjeje të bërë publike me media, në të cilat u demonstrua reagimi i forcave të ushtrisë dhe policisë ndaj një sulmi të simuluar me armë kimike. Një javë pas kësaj stërvitjeje qeveritare, i takoi opozitës shqiptare të provonte sulmin me armë kimike ndaj saj. Ky qëndrim i policisë se ‘ fajin e kanë tullumbacet’, u shoqërua me heshtjen e plotë të kryeministrit në largim”, shtoi ish- kryeministri. Berisha kërkoi nga Prokuroria të hetojë me përparësi qëndrimet dhe vonesat e qëllimshme. “I bëj thirrje Prokurorisë së shtetit të hetojë me përparësi së pari të gjitha këto qëndrime dhe vonesa të qëllimshme, llojin e agjentëve apo agjentit kimik të përdorur në simulimin e sulmit kimik që u bë një javë më parë nga qeveria dhe dëmtimet që ai shkakton, si dhe, me ndihmën e institucioneve partnere më të specializuara, të përcaktojë me urgjencë agjentin e përdorur në sulmin kimik, me sa duket, terrorist që u ndërmor kundër opozitës shqiptare”, deklaroi Berisha.