“Dosjet para ’ 95, faturë për gjysmën e vendimeve”
Pjesa tjetër pa faturë, për shkak të mangësive në dokumentacion
Vetëm gjysma e vendimeve të pretenduara se janë vlerësuar nga Agjencia e Pronave janë vlerësuar në të vërtetë, pasi pjesa tjetër, për shkak të mangësive në dokumentacion, nuk ka ende një faturë. Kështu, sipas shoqatës “Pronësi me Drejtësi”, nga 10.763 vendime që datojnë në vitet ’ 93, ’ 94 dhe ’ 95, vetëm gjysma janë vlerësuar financiarisht. Pjesa tjetër nuk është njohur ende me masën e përfitimit. “ATP ka vlerësuar sipas saj vendimmarrjen e vendimeve të komisioneve të kthimit dhe kompensimit të pronave për kompensim për vitet ’ 93, ’ 94 e ’ 95. Në total ajo ka pranuar se janë vlerësuar 10.763 vendime nga 23.628 vendime për kompensim të dhëna në harkun e viteve 1993- 2013, pra 45.5% të gjithë vendimmarrjes. Por kjo vendimmarrje e marrë deri më sot për vitet ’ 93’ 95 ka pranuar se ka vlerësuar si ‘ të ezauruar’ 1217 vendime të vlerësuara, konkretisht janë 5189, ndërsa 4247 vendime nuk janë të vlerësuara sepse ATP e ka pasur të pamundur të vlerësojë llojin e tokës para vitit 1945", thuhet në deklaratë. Në fillim të muajit maj, Agjencia e Trajtimit të Pronave ka përfunduar vlerësimin financiar edhe për vendimet e dhëna në 1995- n. Nga 6838 vendime, vetëm për 4450 ishte e përcaktuar masa e kompensimit, përllogaritur me skemën e re, ku një metër katror vlerësohet me çmimet e sotme, por zëri kadastral është ai që prona ka pasur në momentin e konfiskimit. Për pjesën tjetër të përfituesve nuk ka ende një faturë, kjo për shkak të mungesës së dokumentacionit. Këto familje kanë 6 muaj afat për të bërë plotësimin e dosjes, në mënyrë që të bëhen pjesë e skemës së kompensimit. Nëse kjo nuk ndodh, atëherë prona e tyre do të vlerësohet me çmim minimal. Një gjë e tillë e redukton edhe më tej faturën.