Veliaj në Këshillin Bashkiak: Tri projektet që hapen këtë muaj
“Hapim Parkun Olimpik, sheshin ‘ Skënderbej’ dhe Bulevardin e Ri”
Janë tri projekte me vlerë për kryeqytetin që Bashkia e Tiranës do t’i përurojë në më pak se tri javë. Bëhet fjalë për Parkun Olimpik, i cili do të hapet vetëm pas tri ditësh, i ndjekur nga sheshi “Skënderbej” dhe Bulevardi i Ri.
Lajmin e bëri me dije një ditë më parë kryebashkiaku Erion Veliaj gjatë mbledhjes së Këshillit Bashkiak. “Në datën 4 qershor do të hapim Parkun Olimpik të Tiranës, ndërsa pasditen e datës 10 qershor do të bëjmë hapjen ceremoniale të sheshit ‘ Skënderbej’. Në datën 17 qershor do të bëjmë hapjen e segmentit të parë të Bulevardit të Tiranës”. Nga projektet e lartpërmendura, dy prej tyre do të jenë sërish kantiere, pasi puna do të vijojë edhe pas inaugurimit. “Në segmentin e dytë të Bulevardit të Ri vazhdojmë të jemi kantier. Hapja e segmentit të parë mundëson që për të gjitha hapësirat e lulishteve dhe të korsive të biçikletave mund të aksesohen. Mbi të gjitha, parkingu nëntokësor nëpërmjet bulevardit te zona e Stacionit të Trenit, e cila çliron një pjesë të trafikut dhe problematikave në atë zonë. Po ashtu, në sheshin ‘ Skënderbej’ do të punohet me 11 lulishtet tematike dhe disa projekte shtesë”. DEBATET Ndryshimet e vazhdueshme në buxhetin e miratuar që në muajin dhje- tor, si dhe zgjerimi i kompetencave të shoqërisë “Eco Tirana” ishin dy pikat që u shoqëruan me debate. Për këshilltarin e PD- së, Akil Kraja, pas këtij vendimi fshihet një skenar ogurzi për mjedisin, ndaj kërkoi që vendimi të mos miratohet. “Ky këshill kërkon t’i japë mundësinë kompanisë që të lidhë kontrata jashtë procedurave publike me kompani të treta për të ndërtuar një incenerator në Tiranë. Ky vendim është i paligjshëm, faktet e denoncuara një vit më parë po dalin një më një”. Gjithë debatin për veprimtarinë e kompanisë me origjinë italiane, kryetarja e këshilltarëve socialistë, Klotilda Ferhati, e cilësoi një lumë përbaltjesh, e njëjtë me zhurmën që u bë për parkun e lojërave në liqenin e Tiranës. “Po keqinformoni qytetarët, të cilët duke ju dëgjuar ju, kujtojnë se me të vërtetë se atje po bëhet një incenerator. ‘ Eco Tirana’ ka një objekt veprimtarie, që për ta bërë sa më mirë të jetë e mundur punën e saj, do t’i duhet të bashkëpunojë dhe me kompani të tjera. Ju po ndërtoni teori konspiracioni për inceneratorë e për gjëra të pavërteta. Puna është ajo që na ndan ne nga ju”. Në përfundim të diskutimeve, vendimi për zgjerimin e kompetencave të “Eco Tirana” nuk kaloi për mungesën e kuorumit të nevojshëm, duke bërë që këshilli të kërkojë të rimblidhet më 5 qershor. Pjesë e rendit të ditës ishte edhe një projektvendim shtesë për subvencionimin e qirasë mujore për 60 familje, lista e të cilëve i bashkëngjitet shkrimit.