Bombë në zonën diplomatike në Kabul, janë 90 të vdekur
Dëmtohen ambasadat gjermane e franceze, 400 të plagosur
Një bombë e fuqishme shpërtheu në një zonë të sigurt të Kabulit në kulmin e qarkullimit të mëngjesit të së mërkurës, duke vrarë të paktën 90 veta dhe duke plagosur 400 të tjerë, sipas zyrtarëve afganë.
Shpërthimi, i cili ndodhi në muajin e shenjtë mysliman të Ramazanit, ishte një nga më vdekjeprurësit që goditi kryeqytetin afgan në vitet e fundit. Bomba shpërtheu në lagjen diplomatike pranë Ambasadës Gjermane dhe pallatit presidencial afgan. Rrugët ishin të mbushura me kalimtarë, njerëz që bënin pazare dhe fëmijë që shkonin në shkollë. Bomba, e fshehur në një kamion për shpërndarjen e ujit, shpërtheu në orën 8: 22 të mëngjesit sipas orës lokale, jashtë zyrave të një kompanie të madhe celulare lokale dhe një stacioni të njohur televiziv. Ai goditi disa metra larg nga ambasada gjermane, në një nga pjesët më të populluara të qytetit, pranë supermarketeve dhe dyqaneve të mëdha. Talibanët mohuan përgjegjësinë për sulmin në një deklaratë. Asnjë grup nuk e ka marrë përgjegjësinë e tij. Gazetarja e “Wall Street Journal”, Jessica Donati, në Kabul, tha se shpërthimi ndodhi pranë ambasadave perëndimore, institucioneve qeveritare dhe rezidencave të zyrtarëve të lartë dhe familjeve të tyre. “Është pjesa më e fortifikuar e qytetit, e cila mund të arrihet vetëm duke kaluar nëpër disa pika kontrolli”, shtoi ajo. Një shofer afgan i BBC vdiq në shpërthim dhe katër gazetarë u plagosën. Të paktën 11 shtetas amerikanë të caktuar në ambasadën amerikane si kontraktorë u plagosën në shpërthimin në Kabul, sipas zyrtarëve të SHBA. Ministri i Jashtëm gjerman, Sigmar Gabriel, tha se sulmi ishte shumë afër ambasadës së tyre. “Sulmi ka pasur për qëllim civilët dhe ata që janë në Afganistan dhe punojnë me njerëzit atje për një të ardhme më të mirë të vendit”, tha Gabrieli. Ai shtoi se kishte disa zyrtarë të ambasadës të plagosur, por jashtë rrezikut për jetën. Ka humbur jetën një oficer i sigurisë afgane që mbronte zonën e ambasadës. Edhe Ambasada franceze u dëmtua në shpërthim, sipas Marielle de Sarnez, ministrja franceze për Çështje Europiane. Ajo tha për “Radio Europe 1” se raportimet fillestare nuk tregojnë se shtetasit francezë janë midis të vdekurve, por kjo pritet të konfirmohet.