Debate të ashpra për qeverinë në Maqedoni, shqiptarët me 9 ministri
Në Maqedoni u debatua ashpër për formimin e qeverisë së re të vendit, mes polemikash të shumta ndërmjet LSDM- së dhe VMRO- DPMNE. Qeveria duhet të votohej deri në mesnatë, dhe pritej miratimi nga 62 deputetë, që e mbështetën formulën e Zoran Zaev. Pengesat e fundit për hije dyshimi mbi ministrat e propozuar janë hequr, duke i hapur kështu rrugën miratimit të listës së propozuar. Prokuroria Speciale e Maqedonisë, pas kërkesës së LSDM-së për të vërtetuar pastërtinë e kandidatëve për ministra, ka njoftuar se asnjëri prej tyre nuk është në hetim, duke i hapur kështu rrugë përfshirjes së tyre në qeveri. Pak ditë më parë u publikuan lajme që ngrinin dyshime mbi përfshirje në çështje penale të tri kandidatëve për ministra nga BDI- ja dhe mandatari për formimin e Qeverisë, Zoran Zaev, kërkoi nga Prokuroria Speciale një konfirmim mbi pastërtinë ligjore të disa prej emrave të propozuar për kabinetin e tij. Qartësimi i PSP- së për kabinetin e ri qeveritar që është propozuar nga Zoran Zaevi, është dorëzuar në Kuvend. Ashtu si edhe të martën, Kuvendi i Maqedonisë ka vazhduar të jetë i blinduar nga forca të shumta të policisë në pritje të votimit të qeverisë së re. Qindra policë ishin vendosur rreth Parlamentit të Maqedonisë. Masat vijnë duke pasur parasysh atë që ka ndodhur më 27 prill, kur Talat Xhaferi u zgjodh kryetar i Parlamentit dhe më pas mbështetës të Nikola Gruevskit hynë në Kuvend duke përgjakur deputetë shqiptarë dhe ata të LSDM- së. Debati në Kuvendin e Maqedonisë për zgjedhjen e qeverisë u përcoll me polemika të shumta mes deputetëve të shumicës së re dhe VMRO-së opozitare, e cila akuzon LSDM- në dhe partitë shqiptare, që do të jenë pjesë e ekzekutivit, për shkelje të rregullores lidhur me drejtimin e seancës, por edhe për programin e ekzekutivit të mandatarit Zoran Zaev. Pas gjashtë muajsh krizë në qeverinë e Maqedonisë, partitë pjesëmarrëse në qeverinë e re ( LSDM, BDI dhe Aleanca për shqiptarët) përfaqësohen me nëntë ministra, BDI me gjashtë dikastere, Aleanca për shqiptarët me dy dhe një ministër pa portofol i propozuar nga LSDM- ja. Pesë ministri dhe një dikaster pa portofol do të drejtohen nga BDI- ja, ndërsa dy ministri të tjera nga Aleanca për Shqiptarët, një do ta marrë LR-PDSH- ja dhe një tjetër RDKja e Vesel Memetit.