‘ Fanatics’ protestë te Bashkia: Shkarkojeni Halilin
Grupimi i tifozëve "Tirona Fanatics" ka organizuar dje një protestë para Bashkisë së Tiranës, duke i kërkuar kryebashkiakut Erion Veliaj që të mbajë qëndrim për rënien e klubit nga kategoria. Ultrasit bardheblu i kanë kërkuar atij publikisht që të shfuqizojë akordin me presidentin Refik Halili, duke i hequr aksionet dhe drejtimin e këtij të fundit. "Drejtuar kryetarit të Bashkisë së Tiranës, z. Erion Veliaj. Kërkesë: Duke parë ndodhitë e fundit dhe rënien nga kategoria të KF Tirana, kërkojmë rishikimin e aksioneve dhe shfuqizimin e z. Refik Halili bazuar në pikat e mëposhtme: Dështim në ndërtimin e një klubi të strukturuar. Borxhet e pashlyera dhe shmangja e detyrimeve. Mashtrimet dhe mungesa e transparencës ndaj tifozëve. Objektivi dhe buxheti vjetor i padeklaruar. RËNIA NGA KATEGORIA.
Si aksioner të KF Tiranës dhe institucioni që i besoi pjesën më të madhe të aksioneve z. Refik Halili, kërkojmë nga Bashkia Tiranë mbajtjen e një qëndrimi korrekt ndaj POPULLIT BARDH E BLU dhe qytetarëve të Tiranës. Detyrimi juaj kryesor është KF Tirana dhe jo ekipe të tjera të futbollit", kanë shkruar ultrasit në kërkesën e hapur drejtuar kryebashkiakut të kryeqytetit.
Ata kanë qenë të pranishëm në stadium për ndeshjen finale. Që në hyrje, kanë protestuar kundër presidentit Halili dhe kanë qëndruar vetëm për disa minuta. Ata kanë shpalosur një banderolë gjigante kundër numrit një të klubit dhe në momentin që është shënuar goli i avantazhit për kryeqytetasit, ata kanë ndërprerë ndeshjen me anë të flakadanëve dhe tymueseve që kanë hedhur në fushë. Më pas, kanë braktisur ndeshjen dhe janë larguar nga stadiumi.