VLERA E TROJEVE Pronat, skadon afati për vendimet e 1995
Një muaj pas publikimit të regjistrit me emrat e pronarëve dhe vlerësimin financiar, skadon afati i ankimimit. Çfarë ndodh me vlerën e tokës
Njëzet e katër orët e ardhshme janë shansi i fundit që pronarët kanë për t’iu drejtuar gjykatës.
Afati 1- mujor për ankimimet skadon nesër, duke mbyllur në këtë mënyrë të gjitha shtigjet për të pakënaqurit. Prej 9 qershorit, çdo vlerësim i kryer nga Agjencia e Pronës është i ekzekutueshëm, çka do të thotë se të gjithë ata që kanë në duar vendime të 1995- s dhe nuk pajtohen me masën e përfitimit që iu është përllogaritur, nga nesër e në vijim nuk do të kenë asnjë mundësi apo hapësirë ligjore në favorin e tyre për ta kundërshtuar.
VENDIMET Nga të dhënat e regjistrit të publikuar në datën 8 maj, rezulton se janë të paktën 1250 pronarë me vendime ’ 95, të cilët janë penalizuar nga skema e re që ka nisur zbatimin për më se një vit. Ligji i ri i pronave përcakton një afat 30- ditor për ankimimet. Pra, nga momenti që bëhet publikimi i regjistrit me vendimet e vlerësuara financiarisht, pronarët kanë një muaj kohë në dispozicion për t’iu drejtuar Gjykatës Administrative të Apelit. Pak ditë më parë, shoqata “Pronësi me Drejtësi”, përmes një deklarate për mediat, u bëri thirrje pronarëve që të shfrytëzojnë mundësinë e fundit që kanë për të mos lejuar efektet negative të ligjit të ri. Sipas shoqatës, dy janë kategoritë që preken: pronarët, të cilët janë shpallur nga ATP si të kompensuar, pra përbri emrit është shënuar “ezauruar”, të tilla rezul- tojnë 927 vendime, si edhe ata që kanë ndryshim të zërit kadastral. Pra, ka qenë tokë bujqësore dhe sot, pavarësisht se është brenda vijave të verdha, kompensimi iu llogaritet ashtu siç rezulton në kohën e shpronësimit. “Nëse vendimi nuk ankimohet, bëhet titull ekzekutiv. Kjo do të thotë që është e pamundur që këto familje t’i drejtohen gjykatës për të kërkuar të drejtën e tyre. Më e keqja është se me tejkalimin e këtij afati, këto familje humbasin, përveç mundësisë së shfrytëzimit të shkallëve të gjyqësorit shqiptar, edhe mundësinë që t’i drejtohen Gjykatës së Strasburgut. Ne jemi të vetëdijshëm që është një proces i mundimshëm, por për pronarët është e vetmja zgjidhje që ka mbetur”, apeloi Myrshit Vorpsi pak ditë më parë.
VLERËSIMI Nga 6838 vendime që datojnë në 1995- n, vetëm për 4454 prej tyre ka përfunduar vlerësimi ekonomik. Për pjesën tjetër të përfituesve nuk ka ende një faturë. Kjo për shkak të mungesës së dokumentacionit. Këto familje kanë 6 muaj afat për të bërë plotësimin e dosjes, në mënyrë që të bëhen pjesë e skemës së kompensimit. Nëse kjo nuk ndodh, atëherë prona e tyre do të vlerësohet me çmim minimal. “Të gjitha familjet e trashëgimtarëve ligjorë të subjekteve të shpronësuar kanë 6 muaj afat ligjor kohë të paraqesin pranë sporteleve të ATP-së dokumentacionin plotësues të vlefshëm për pozicionimin e pronës, identifikimin e zërit kadastral në momentin e shpronësimit me qëllim nxjerrjen e vlerësimit ekonomik përkatës për secilin prej tyre. Me kalimin e këtij afati, bazuar në legjislacionin në fuqi, Agjencia do të shpallë vlerësimin ekonomik, i cili do të bazohet në zbatimin e dispozitave ligjore përkatëse të ligjit 133/ 2015 ‘ Për trajtimin e pronës dhe përfundimin e procesit të kompensimit të pronave’”, është shprehur më herët drejtoresha e ATPsë, Qato.