Leksioni te “Luarasi”, Malaj: Sfida e Shqipërisë, mirëqeverisja
Rektori: Vendet e Ballkanit Perëndimor mund të anëtarësohen në Bashkimin Europian në bllok
Sfidat e Shqipërisë drejt Bashkimit Europian ishin në fokus të leksionit të hapur që rektori i Kolegjit Universitar "Luarasi" mbajti dje me studentët e drejtësisë.
Për prof. dr. Malajn, vendi ynë është i vetmi vend në Ballkan që nuk rrezikohet nga konfliktet etnike apo fetare dhe as nga tendencat nacionaliste. E për rrjedhojë, rruga e saj drejt anëtarësimit është e lehtë nëse ajo mirëqeveriset. "Sfida kryesore e Shqipërisë mbetet mirëqeverisja, materializimi i saj në jetën e përditshme të shqiptarëve, vazhdimi i kontributit pozitiv në sfidat e Ballkanit Perëndimor dhe promovimi i bashkëpunimit ekonomik midis të gjitha vendeve të Ballkanit, duke lënë pas të shkuarën dhe duke i shërbyer të ardhmes së përbashkët europiane". Pavarësisht se jemi në një periudhë zgjedhjesh, sipas rektorit Malaj, të gjithë faktorët politikë, shoqërorë dhe ekonomikë duhet të angazhohen për të lehtësuar përmbushjen e detyrimeve të palës shqiptare në të gjitha sfidat që ka procesi ynë i integrimit europian. "E ardhmja europiane e Shqipërisë është opsioni i vetëm dhe më i mirë për kombin, pasi do të ndihmojë që shqiptarët të rrisin kontributet e tyre pozitive dhe bashkëpunimet ekonomike me rajonin e Ballkanit", nënvizon rektori. Duke folur për integrimin e vendeve të Ballkanit Perëndimor, rektori i "Luarasi" është i mendimit që ata do të anëtarësohen në bllok. "Nëse do të kishim dy alternativa, vendet e Ballkanit Perëndimor do të anëtarësohen një nga një apo në grup; mbetem mbështetës i opsionit të dytë. Kjo do të testohet dhe nga bashkëpunimi që vendet e Ballkanit do të kenë nën principet kryesore të konferencë së Berlinit". Por, sipas tij, së pari, duhen gjetur zgjidhje për problemet ekonomike e sociale, në mënyrë që, duke zgjidhur problemet brenda vendit, të lehtësohet anëtarësimi. Nëse do të ketë një datë të afërt apo jo, profesori e ka të vështirë ta thotë, pasi Europa po ndryshon me ritme të shpejta e pozitive. "Zhvillimet po vijnë duke u përmirësuar. Ka gjallërim të rritjes ekonomike, ka fitore politike të progresistëve në zgjedhjet parlamentare, siç ishte rasti i Francës", shpre- het prof. dr. Malaj. Filozofia e Bashkimit Europian, që me bashkëpunimin teknik dhe ekonomik mund të eliminohet çdo konflikt apo luftë, sipas rektorit po çon në ndërgjegjësimin e shumë shteteve, veçanërisht pas "Brexit". Ndërsa bllokimi i zgjerimit të BE- së për një periudhë kohe të pacaktuar duket se nuk dëmton vendin tonë, i cili, sipas rektorit Malaj, nuk është ende gati. Leksioni i hapur u zhvillua në formën e një bashkëbisedimi me studentët, duke nxitur të menduarit kritik e argumentues.