Mediu: Të gjitha votat për PD
Kreu i PR- së dhe kandidati për deputet në listat e Tiranës, Fatmir Mediu, u ka kërkuar përfaqësuesve të forcës së tij politike që të gjitha votat në zgjedhjet e 25 qershorit t’i japin për PD. Në një takim të zhvilluar në zonën e Kombinatit në Tiranë, Mediu kujtoi premtimet e pambajtura dhe dështimet e qeverisë “Rama”. “Gënjeshtrat për vende pune dhe shëndetësi falas, dhuna ndaj të pamundurve dhe përkrahja e bandave dhe të fortëve në këmbim të votave e pazareve, e kanë shoqëruar në çdo hap qeverisjen në Republikën e vjetër, e cila e shkërmoqi imazhin e Shqipërisë në botë nëpërmjet kanabizimit të të gjithë territorit”, deklaroi Mediu. Sipas kreut të PR- së, ekonomia e fortë me taksa të ulëta do të jetë prioriteti kryesor i Republikës së re. Sipas Mediut, votat e opozitës duhet të bashkohen me PD që të maksimalizohet rezultati. “Të gjitha votat duhet të shkojnë për Partinë Demokratike, si mundësia e vetme për të maksimalizuar aksionin e opozitës së bashkuar nën siglën e PD”, u shpreh Mediu.
Kryetari i opozitës, Lulzim Basha, u është përgjigjur sërish akuzave të Lëvizjes Socialiste për Integrim lidhur me pushimin nga puna të funksionarëve të saj në administratë.
Në një takim të zhvilluar me simpatizantët e PD në Mallakastër, Basha i kujtoi LSI-së se koha e maskarenjve ka marrë fund dhe nëse do të kërcënohen sërish qytetarët, do të pushohen jo 30, por 300 drejtorë. “Ne ia dolëm të rrëzonim projektin e krimit, drogës dhe oligarkisë për të diktuar zgjedhjet në vend të vullnetit të qytetarëve. Me 7 gardianë ministra teknikë, të cilët kanë për detyrë të zbatojnë Kodin e ndryshuar Penal dhe të çojnë prapa hekurave këdo që guxon të prekë votën dhe vullnetin e qytetarëve. Ankohen se kanë ikur 20 apo 30 drejtorë. Do të ikin edhe 300 të tjerë, nëse do të guxojnë të prekin dhe të shantazhojnë qytetarët. Koha e zullumqarëve po merr fund. Koha e maskarenjve po merr fund. Koha e matrapazëve po merr fund. Koha e mashtruesve po merr fund. Po vjen koha e njerëzve të thjeshtë”, deklaroi Basha. Sipas kreut të opozitës, drejtuesit e Republikës së vjetër po përpiqen ta shesin marrëveshjen me PD si një koncesion dashamirës, ndërkohë që me firmosjen e tij kanë pranuar kapitullimin. “Përfaqësuesit e Republikë së vjetër, me në krye Edi Ramën, po bëjnë gjithçka për ta shitur këtë si një koncesion dashamirës ndaj Partisë Demokratike apo ndaj meje, duke ngritur gishtat lart. Duke folur për kryengritje të Republikës së vjetër. Ju e dini fare mirë se çfarë e shtyu Republikën e vjetër të dorëzohej dhe të pranonte kapitullimin. I vet- mi synim që kanë është të mbajnë pushtetin e tyre”, deklaroi Basha.
PROGRAMI Gjatë takimit me fermerët në Lushnje, Basha premtoi se ata do të përfitojnë 100 milionë euro para në dorë, çka do t’u ulë koston e mekanikës dhe imputeve të tjera. “Plani ekonomik i Republikës së re mbështetet në 4 shtylla kryesore dhe një shtyllë kryesore është mbështetja e fermerëve shqiptarë me 100 milionë euro subvencione të drejtpërdrejta. Kjo do të bëjë të mundur që fermerët shqiptarë ta zerojnë koston e mekanisës bujqësore. Do të ulin dhe zerojnë koston e plehrave kimike dhe imputeve të tjera bujqësore. Duke zeruar këtë kosto, djersa e fermerëve të Myzeqesë, djersa e fermerëve shqiptarë, kurrë më nuk do të kthehet në mallkim, por në mirëqenie, në punësim, në para për ta dhe familjet e tyre. Nuk do të mjaftohem me kaq”, tha Basha. Kreu i PD- së theksoi se nën shembullin e Presidentit amerikan Trump, i cili beson te globalizmi dhe tregtia e lirë, nuk do lejohet më që në Republikën e re, prodhimet bujqësore të fermerëve, djersa e tyre e ballit, të konkurrohet në mënyrë të pandershme nga mallrat dhe prodhimet e subvencionuara të fermerëve të huaj.