Barnat e reja me rimbursim për 2017, Qeveria “mban peng” vendimin

Edhe pse jemi në muajin qershor, Qeveria ende nuk ka zyrtarizuar listën e re të barnave me rimbusim. Ndryshe nga çfarë ka ndodhur në vitet e kaluara, vendimi ende nuk ka kaluar për miratim, ndonëse ishte parashikuar që të hynte në fuqi prej datës 1 maj të këtij viti. Kujtojmë që në fund të muajit mars, Këshilli Administrativ i Fondit të Sigurimit të Kujdesit Shëndetësor kaloi për miratim listën e re të barnave me rimbursim, duke e përcjellë vendimin në Qeveri. Por kur kanë kaluar më shumë se 2 muaj, vendimi ende vijon të qëndrojë në sirtarë, duke i privuar qytetarët që të përfitojnë nga paketat shëndetësore apo medikamentet e reja që janë futur rishtazi në skemë. Sipas FSDKSH, listës këtë vit i janë shtuar edhe 30 barna të reja, kryesisht për të sëmurët me zemër, veshka dhe tumor. Me vendim të Këshillit Administrativ të Fondit, janë zgjeruar të gjitha paketat shëndetësore që mbulohen nga sigurimet shëndetësore, si në spitalet publike, ashtu edhe ato private. Përfitues janë pacientët që vuajnë nga dializa, të cilët do të përfitojnë dy paketa të reja, atë të fistulës dhe graftit, të cilat do të financohen plotësisht nga Fondi, si në shërbimin publik, ashtu edhe në atë privat. Gjithashtu janë shtuar disa ekzaminime të reja në paketën e dializës, në mënyrë që shërbimi i ofruar në paketë të jetë i plotë dhe tërësisht në sinkron me protokollet europiane të këtij shërbimi. Ndryshime të rëndësishme kanë pësuar edhe paketat e kardiologjisë dhe kardiokirurgjisë. Përpos interventit, nga dy ditë qëndrim në terapi intensive të parashikuar në paketat e mëparshme, tashmë janë tetë ditë qëndrim në terapi intensive për interventet e kardiokirurgjisë, që do të mbulohet financiarisht nga Fondi. E fundit është paketa e implantit koklear për fëmijët me probleme dëgjimi. Paketa që financohet nga Fondi do të përfshijë rishtazi përpos interventit edhe pajisjen e implantit koklear.