Kamion me kastravecë për në Itali, fshihen 705 kg drogë
Zbulohet nga kontrolli në skaner, arrestohet i riu maqedonas
Kamioni i ngarkuar me kastravecë do të trafikonte edhe një sasi të madhe droge nga Maqedonia drejt Italisë.
Policia bëri të ditur se dje, rreth orës 00: 30, u zbulua dhe u sekuestrua në Portin e Durrësit 705 kg lëndë narkotike, në tentativë për t'u trafikuar drejt Italisë. Droga u zbulua nëpërmjet skanerit në pikën Kufitare në kamionin e drejtuar nga shtetasi maqedonas Kiril Filev, 32 vjeç, e fshehur nëpërmjet arkave të mbushura me kastravecë për eksport. Policia ka arrestuar drejtuesin e kamionit ku u zbulua lënda e llojit kanabis sativa, ndërsa ka shpallur në kërkim dhe po punohet për arrestimin e tre bashkëpunëtorëve të tjerë, që dyshohet se janë të implikuar në këtë rrjet të trafikut ndërkombëtar të lëndëve narkotike.
"Më datë 06.06.2017, gjatë kontrollit të ushtruar në Pikën e Kalimit Kufitar Durrës, në mjetin tip kamion me drejtues shtetasin maqedonas Kiril Filev, 32 vjeç, pas dyshimeve nga specialistët se në brendësi të tij kishte lëndë narkotike, për verifikim më të hollësishëm u kontrollua në skaner. Në përfundim u konkludua një sasi lënde narkotike e dyshuar e llojit kanabis sativa. Kamioni ishte i ngarkuar me kuti të mbushura me kastravecë dhe në mes të kastravecëve kishte qese të mbushura me lëndë narkotike. Pas peshimit, rezultoi në total një sasi rreth 705 kg lëndë narkotike e dyshuar e llojit kanabis sativa", deklaroi Policia nëpërmjet një njoftimi për shtyp. Po të njëjtat burime sqarojnë se kishin marrë të dhëna në rrugë operative për tentativën e trafikut dhe se agjentët e Antidrogës kishin mbajtur nën vëzhgim prej disa ditësh grupin kriminal. Në saje të informacioneve e të dhënave të mbledhura, seksioni kundër narkotikëve ka qenë i bindur se brenda në kamionin me ngarkesë me kastravecë fshihej lënda narkotike, me destinacion Italinë. "Policia kishte informacione të marra në rrugë operative se grupi kriminal do të tentonte të trafikonte drejt Italisë lëndën narkotike. Në këto kushte, sapo kamioni i dyshuar i ngarkuar me kastravecë për eksport mbërriti në Portin e Durrësit, drejtuesit Kiril Filev iu kërkua t'i drejtohej skanerit, ku dhe u konstatua se brenda arkave me kastravecë fshihej edhe lëndë narkotike", bënë të ditur burime nga Policia. Menjëherë drejtuesi i kamionit, shtetasi maqedonas Kiril Filev, u arrestua në flagrancë, ndërsa u shpallën në kërkim tre bashkëpunëtorët e tij. Mësohet se drejtuesi i kamionit nuk ka pranuar të ketë pasur dijeni për ngarkesën e lëndës narkotike, duke u justifikuar se ishte thjesht një shofer. Kjo është ngarkesa e parë e madhe e sekuestruar në Portin e Durrësit, pas shkarkimit të zyrtarëve që u akuzuan për lejimin e 8 tonëve hashash, i cili u bllokua në Itali.
Më datën 17 prill 2017, Prokuroria urdhëroi arrestimin e doganierëve e efektivëve të policisë në Portin e Durrësit dhe në Doganën e Qafë- Thanës, pasi lejuan të kalonin tonelata me drogë drejt Italisë. Për këtë shkak, Prokuroria e Krimeve të Rënda urdhëroi arrestimin 10 punonjësve të policisë në Portin e Durrësit, përfshirë edhe shefin e stacionit policor, si edhe 8 doganierë të QafëThanës, Durrësit e Tiranës. Ata dyshohet se kanë siguruar kushtet për kalimin e dy ngarkesave të ndryshme, me peshë totale 10 tonë kanabis sativa nga Shqipëria në Itali, në shkurt dhe mars 2017. Prokuroria për Krime të Rënda i akuzon policët dhe doganierët për veprën penale të "Trafikut të narkotikëve", kryer në bashkëpunim. Ndaj tyre është caktuar masa e sigurimit "arrest me burg", ndërsa policia i ka ekzekutuar këto urdhërarreste.