Fsheh 70 kg drogë në shkallët e pallatit, arrestohet 24- vjeçari

ELBASAN - Policia e Elbasanit arrestoi dje katër të rinj, pasi u kapën në flagrancë duke transportuar një sasi prej 65 kg kanabis sativa. Të arrestuarit po transportonin lëndën narkotike nga Durrësi për në Elbasan me qëllim shitjen e saj. Asllan Muka, 38 vjeç, banues në Shijak, Fidel Osma, 23 vjeç, Amarildo Braçe, 29 vjeç, si edhe Mario Hoxholli, 23 vjeç, të tre banues në Durrës, u arrestuan në fshatin Lolaj të Peqinit. Arrestimi i tyre u bë pasi gjatë një kontrolli ushtruar në mjetin "BMW X5", me targa AA 006 KY, drejtuar nga Asllan Muka, u gjet sasia prej 65 kg kanabis. Nga veprimet hetimore paraprake, rezulton se trafikimi i lëndës narkotike dyshohet të jetë kryer në bashkëpunim nga shtetasit Fidel Osma, i cili po drejtonte një tjetër automjet me targa AA 101 MY, Asllan Muka, Amarildo Braçe dhe Mario Hoxholli. Ata qarkullonin me dy mjete, ku në mjetin tip "BMW X5" ndodhej edhe lënda narkotike, ndërsa mjeti tjetër i shoqëronte nga pas. Dyshohet se lënda narkotike vinte nga Durrësi në drejtim të Elbasanit dhe ishte gati për shitje. Operacioni "Transportuesi" u finalizua falë informacioneve që policia kishte siguruar në rrugë operative. Përveç dy automjeteve, u sekuestruan dhe pesë telefona, si dhe një shumë prej 2670 eurosh. Policia bën me dije se ndalimi i tyre në superstradën Elbasan- Peqin është bërë në bazë të informacioneve të marra se në njërin nga mjetet kishte lëndë narkotike.

VLORË - Një i ri nga Vlora kishte zgjedhur një vend jo të zakonshëm për të fshehur kanabisin. Nikolas Toçaj, 24 vjeç, u arrestua pasi gjatë një kontrolli të policisë, u zbulua një sasi prej 70 kg kanabis e fshehur prej tij në sheshpushimin e katit ku kishte apartamentin, në lagjen "Pavarësia". Ai e kishte fshehur lëndën narkotike në katër qese plastike të mëdha dhe më pas e kishte mbështjellë me natriban. Toçaj nuk e kishte futur kanabisin brenda në apartament, por e kishte vendosur atë në një hapësirë pranë shkallëve të pallatit. Përveç lëndës narkotike, policia ka sekuestruar edhe një furgon në pronësi të tij, që dyshohet se është përdorur për transportin e kanabisit. Burime nga Policia e Vlorës kanë konfirmuar se Toçaj do të merret në pyetje nga grupi hetimor për të saktësuar destinacionin e lëndës narkotike, si dhe nëse në këtë vepër janë të përfshirë edhe persona të tjerë. Po kështu burime nga Policia e Vlorës kanë konfirmuar se kontrollet po vijojnë në zonën e Pyllit të Sodës, por edhe pika të tjera, të cilat mbeten problematike, në mënyrë që të evidentohet nëse ka ndonjë tjetër sasi lënde narkotike të fshehur apo edhe ndonjë mjet lundrues që mund të përdoret për trafikimin e drogës drejt Italisë. Për të parandaluar fenomenin e kultivimit masiv të bimëve narkotike, por edhe trafikimin e drogës, në Qarkun e Vlorës është ngritur një Task- Forcë antikanabis, që do të koordinojë punën mes Policisë së Qarkut, Policisë Kufitare, njësive vendore, si dhe institucionit të prefektit.