E rrallë, në Iran sulmohet Parlamenti, 12 të vdekur
Garda akuzon sauditët e SHBA: Sulmi, pas vizitës së Trump
Njerëz të armatosur kanë kryer sulme në kryeqytetin e Iranit, Teheran, duke vrarë të paktën 12 veta me armë zjarri, shpërthime nga vetëvrasës në Parlament dhe në varrezën e udhëheqësit revolucionar islamik të vendit.
ISIS mori përgjegjësinë për sulmet në Teheran, të parat që ndërmerr ky grup në Iran. Dy sulmet ndodhën në mes të muajit të shenjtë të Ramazanit. Këto sulme kanë shokuar iranianët. Parlamenti respektohet gjerësisht si një zë në politikat e brendshme iraniane, edhe pse është udhëheqësi suprem, Ayatollah Ali Khamenei, i cili vendos përfundimisht mbi shumicën e çështjeve ndërkombëtare dhe ato të sigurisë. Kompleksi i madh i faltores së paraardhësit të Khameneit, Ayatollah Ruhollah Khomeini, është një pjesë kryesore e homazheve të revolucionit islamik të vitit 1979, i cili përmbysi monarkinë iraniane me aleancë perëndimore. Në Uashington, zëdhënësja e Departa- mentit të Shtetit, Heather Nauert, tha se Shtetet e Bashkuara i dënonin sulmet terroriste në Teheran dhe shprehën ngushëllime për viktimat, familjet e tyre dhe popullin iranian. Transmetuesi shtetëror IRIB njoftoi se sulmet vranë të paktën 12 veta dhe plagosën 42 të tjerë në përplasjen disaorëshe, që përfundoi kur sulmuesit u vranë nga forcat e sigurisë. Agjencia e lajmeve "Amaq" shkruan se ISIS mori përsipër sulmet. Irani është një shtet kryesisht mysliman shiit dhe lufton kundër grupeve ek- stremiste myslimane sunite, si Al- Kaeda dhe ISIS, të cilat i konsiderojnë shiitët si heretikë dhe i kanë sulmuar në të gjithë rajonin. Garda revolucionare e Iranit ka akuzuar Arabinë Saudite të mërkurën, pak orë pas sulmeve terroriste në Teheran. Tensionet në Lindjen e Mesme ishin tashmë të larta për shkak të prishjes së marrëdhënieve mes Arabisë Saudite dhe disa aleatëve sunitë me Katarin, një vend që mban marrëdhënie me Iranin. Në një deklaratë, trupat e Gardës Revolucionare Islamike fajësuan Arabinë Sau- dite, por edhe qeverinë e Shteteve të Bashkuara: "Opinioni publik i botës, veçanërisht Irani, e njeh si shumë të rëndësishëm këtë sulm terrorist, i cili u zhvillua një javë pas një takimi të përbashkët të Presidentit amerikan dhe kreut të një prej qeverive të prapambetura të rajonit, e cila vazhdimisht mbështet terroristët fundamentalistë", duke iu referuar qartë Arabisë Saudite. Deklarata pranoi pretendimin e ISIS për përgjegjësinë. Sipas "New York Times", nga 12 viktimat e sulmeve, 11 vdiqën në ndërtesën e Parlamentit dhe një në mauzole. Gjashtë sulmues u vranë: katër në Parlament, dhe dy në fajtoret e Ajatollahut. Nga sulmuesit, pesë ishin meshkuj dhe një femër. Sulmet nisën rreth orës 10: 30, kur njerëz të armatosur me armë zjarri dhe eksplozivë, disa prej tyre të veshur si gra, zbritën në ndërtesën e Parlamentit duke vrarë të paktën një roje sigurie dhe duke plagosur dhe rrëmbyer njerëz të tjerë. Kjo zgjati rreth katër orë. Në ndërtesë ishin duke u ndërmarrë rinovime që synonin të rrisin sigurinë, veçanërisht në hyrje të saj, por ato ende nuk kanë përfunduar.