Memushaj, SMS De Biazit: Na motivonte Europiani

"Më mirë që humbëm me Luksemburgun, fitojmë në Izrael"

Nga disfatat me Peskarën, te humbjet me Kombëtaren shqiptare. Ledian Memushaj nuk po gjen paqe, por e di rrugën se si mund të rikthehet qetësia dhe rezultatet pozitive në ekipin kuqezi.

Në daljen e djeshme përpara mediave, mesfushori vlonjat ka thënë se një triumf me Izraelin do të sheshonte të gjithë këtë situatë dhe pastaj futbollistët duhet të bëjnë pak pushim për të karikuar bateritë. Kapiteni i Peskarës në futbollin italian thotë se lojtarët nuk mendojnë aspak për fjalët që qarkullojnë mbi të ardhmen e De Biazit, por duan thjesht të bëjnë maksimumin në ndeshjen e radhës.

Humbja- "Mërzia ka ikur dhe duhet të ikte sa më shpejt, sepse përpara kemi Izraelin, një ndeshje shumë e rëndësishme".

Ndeshja- "S'besoj se isha i vetmi i mërzitur pas asaj ndeshjeje, ishim të gjithë sepse nuk bëmë figurë të bukur sa i përket rezultatit. Nuk luajtëm shumë keq, sepse kishim raste, por kur të mund Luksemburgu, çdo gjë të ngjan tragjike. Nëse një humbje e tillë ishte për të ndodhur, më mirë që ndodhi me Luksemburgun sesa të ndodhte me Izraelin".

5 humbje- "Prandaj isha i mërzitur, sepse nuk ishte ndeshja e parë që humbnim, kemi shumë ndeshje që humbim dhe për këtë më vjen më shumë gjynah. Nuk mendoj për ngjashmërinë me situatën te Peskara, kur jam në Kombëtare mendoj vetëm për Kombëtaren".

Ngërçi- "Janë gjëra taktike, për të cilat duhet të pyesni trajnerin. E di që jemi ne në fushë, por nuk është se me Luksemburgun nuk patëm raste, duhet të bënim golin e dytë për të siguruar ndeshjen, kur nuk e bën, rrezikon të pësosh dhe ashtu ndodhi. Është moment i vështirë si fundsezoni dhe nuk dihet si janë lojtarët mendërisht dhe

fizikisht".

Motivimi- "Një vit më parë kishim përpara Europianin dhe ishte ndryshe".

Momenti- "Me rezultate, ky është momenti më negativ që nga koha kur unë jam pjesë e Kombëtares shqiptare".

Rruga- "Një fitore me Izraelin dhe askush s'flet më për krizë apo për gjë tjetër. Është e vetmja mënyrë se si mund të kalohet ky moment i vështirë". Strategjia- "Ne si cilësi

jemi më mirë se ata, por duhet ta tregojmë në fushë, sepse dhe ndeshjen e parë kur ishim 11 me 11 kishim shanse, por pas penalltisë dhe një lojtari më pak ishte më e vështirë".

De Biazi- "Ka një vit që flitet që do largohet trajneri, por ai është akoma këtu. Këto fjalë nuk na interesojnë sepse trajneri s'na ka thënë kurrë që do ikë, ka treguar që do të rrijë këtu, sepse është i kënaqur. S'e di pse dalin këto gjëra".