Biznesi bashkohet: Çfarë kërkojmë nga qeveria e re
Bregasi: Duhet strategji zhvillimi për 10- 15 vitet e ardhshme
Për herë të parë të gjitha shoqatat e biznesit në Shqipëri janë bërë bashkë, duke propozuar paketën që do të ndryshojë ekonominë e vendit.
Para zgjedhjeve, ku partitë kanë programe të ndryshme, Forumi i Sipërmarrjes Shqiptare ka hartuar një platformë ekonomike, e cila iu adresohet të gjitha forcave politike dhe ku përfaqësohen interesat e sipërmarrjes private në Shqipëri. Nga taksat te teknologjia, nga konkurrueshmëria me rajonin te industria, punësimi dhe turizmi, për herë të parë sipërmarrësit shqiptarë kanë hartuar një platformë të qartë për çfarë kërkojnë dhe se si mund të arrihet një rritje e qëndrueshme ekonomike. Pika e parë duket se është më thelbësorja. "Hartimi i një strategjie të zhvillimit ekonomik të vendit për një periudhë 10- 15vjeçare, në konsultim të ngushtë me sipërmarrjen, bazuar në kapacitetet, potencialet dhe burimet që ofron vendi ynë. Kjo strategji, në përputhje me Strategjinë e Integrimit Europian të Shqipërisë do të jetë objekt i një diskutimi të gjerë me grupet e interesit dhe të miratohet me konsensus të gjerë politik në Kuvendin e Shqipërisë. Ky dokument strategjik afatgjatë duhet të pasqyrojë në brendësi linjat kryesore të zhvillimit të sipërmarrjes shqiptare, shtyllat ku do të bazohet, si dhe mekanizmin afatgjatë të implementimit të tij".
Duke folur gjatë aktivitetit të djeshëm, kreu i "BiznesAlbania" qartësoi disa nga kërkesat. "Platforma ekonomike e propozuar nga Forumi i Sipërmarrjes Shqiptare ka si synim zhvillimin e qëndrueshëm ekonomik të vendit, mbrojtjen e interesave të biznesit, që mbështetet në identifikimin dhe analizën e kapaciteteve, potencialeve dhe burimeve që ofron vendi ynë. Hartimi i një strategjie të zhvillimit ekonomik të vendit për një periudhë 10- 15- vjeçare, në konsultim të ngushtë me sipërmarrjen private, bazuar në kapacitetet potenciale dhe burimet që ofron vendi ynë. Kjo strategji në përputhje me strategjinë e integrimit europian të Shqipërisë të jetë objekt i një diskutimi të gjerë me grupet e interesit dhe të miratohet me një konsensus të gjerë politik në Kuvendin e Shqipërisë. Ky dokument strategjik afatgjatë duhet të pasqyrojë në brendësi linjat kryesore të zhvillimit të sipërmarrjes shqiptare, shtyllat ku do të bazohet dhe mekanizmin afatgjatë të implementimit të tij. Ky propozim vjen si një nevojë e domosdoshme që sipërmarrja ka për të qartësuar planet e saj për investimet afatgjata, por edhe si një reflektim mbi vlerësimet më të fundit të Bashkimit Europian ndaj zhvillimit të sipërmarrjes në tërësi në Shqipëri, pasi konstaton se në sektorin e industrisë dhe prodhimit janë kryer vetëm disa studime fizibiliteti, pa një objektiv të qartë se si do të zhvillohen dhe harmonizohen sektorë të ndryshëm të ekonomisë. Gjithashtu, strategjia duhet të orientojë sipërmarrjen private me prioritetet e zhvillimit sektorial e rajonal. Ky model duhet të jetë linjë me programin e Kombeve të Bashkuara që po aplikohet në mbarë botën në lidhje me objektivat e zhvillimit të qëndrueshëm, ku edhe Shqipëria është bërë pjesë e saj", theksoi Bregasi. Nga ana tjetër, forumi ka edhe një kërkesë politike. "Forumi sugjeron që forca politike, e cila do të qeverisë vendin, të marrë në konsideratë se në kompozimin e ardhshëm qeveritar të pranohet që pjesë e kabinetit qeveritar të jetë Ministria e Tregtisë dhe Sipërmarrjes, e cila të ketë në funksionet e saj hartimin e politikave tregtare, promovimin dhe mbështetjen e sipërmarrjes prodhuese dhe proceset e ardhshme të negocimit me jashtë për tregtinë ".