Fëmijët në penelin e brezave të ndryshëm të piktorëve
Ndoshta nuk i ishte kushtuar vëmendje më parë, por bota e fëmijëve është një temë që haset herë pas here në tablotë e piktorëve shqiptarë. Duke qëmtuar në fond, por edhe vepra jashtë tij, Galeria Kombëtare e Arteve ka arritur të bëjë bashkë një seri veprash me këtë temë, të cilat do të ekspozohen ditën e premte, pikërisht nën titullin "Bota e fëmijëve në GKA". Kjo ekspozitë i kushtohet një publiku të veçantë, jo vetëm të rriturve artdashës, por në veçanti krijuesve të vegjël. Sipas një informacioni, të ofruar nga GKA, "në këtë ekspozitë do të prezantohet krijimtaria e përzgjedhur e katër artistëve, si Abdurrahim Buza, Agim Faja, Guri Bulollari dhe Ledia Kostandini, autorë të jashtëzakonshëm, plot fantazi, veprat e të cilëve dinë të flasin në gjuhën e të rriturve e të vegjëlve". Nën kurimin e Esmeralda Dalipit dhe Bujana Demirajt, kjo ekspozitë vjen përpara publikut si një "ditar" me ilustrime të realizuara ndër vite, në teknika të ndryshme, nga autorë të specifikave të ndryshme. "Është vendosja e Abdurrahim Buzës, piktorit më të rëndësishëm realist të shekullit XX, përballë Guri Bulollarit, një piktor autodidakt të pandikuar nga arsimimi akademik, që e bën këtë ekspozitë unike të llojit të saj. Është pre- zantimi i krijimtarisë së Agim Fajës, ilustrues dhe krijues i teksteve letrare për më shumë se 50 vjet në Shqipëri, me mbi 100 libra të ilustruar për fëmijë dhe të rritur, përkrah Ledia Konstandinit, artiste e gjeneratës së re, e cila ilustron përmes mediumit të ri dixhital manual, që e bën këtë ekspozitë një burim kurioziteti për çdo moshë".