Vasili: Kryeministri gënjeu për drogën

“CIA raporton për rritje të prodhimit të kanabisit në vend”

Kryetari i Grupit Parlamentar të LSI- së, Petrit Vasili, reagoi dje për situatën e drogës në vend. Duke iu përgjigjur Kryeministrit Rama, Vasili shkruan në Facebook se ai gënjeu për kanabisin, pasi raporti i CIAs e nxjerr zbuluar. “Kryeministri, ose kryefarsa, gënjeu sot për drogën, por CIA e demaskoi. Sot, Kryeministri gënjeu e tha që ka arritur rezultate spektakolare lidhur me drogën, por të dhënat e Agjencisë Qendrore të Inteligjencës amerikane ( CIA) raportojnë se ka një rritje të prodhimit të kanabisit në vend, si dhe një zgjerim të organizatave shqiptare të trafikimit në Europë. Kryeministri gënjen, sepse është bërë njësh me drogën, me trafikantët dhe krimin e organizuar. CIA foli qartë, që gjithashtu Shqipëria është “pikë aktive e trafikut të drogës”, shkruan kreu i Grupit Parlamentar të LSI- së. Sipas tij, Policia është pjesë e kultivimit dhe trafikut të kanabisit. “Pra, s’ka shtet dhe polici që të kontrollojë territorin, por që e mbështesin, inkurajojnë dhe nxisin mbjelljen masive të drogës dhe trafikun e gjerë të saj. Ndaj Task- Forca është Task- Farsa dhe asgjë më shumë dhe Kryeministri është vetë kryefarsa”, shkruan Vasili. Edhe deputeti i LSI- së, Endrit Braimllari, akuzoi Kryeministrin Rama se ka bashkëpunuar me grupet kriminale të kanabisit. “Në 4 vite Edi Rama bashkëpunoi ngushtë me grupet kriminale, duke lejuar mbjelljen dhe kultivimin e kanabisit.

Edi Rama në 4 vite udhëhoqi rrjetet dhe grupet kriminale me qëllim shfrytëzimin e tyre dhe paratë e krimit për fushatë elektorale. Edi Rama tani kërkon të lajë duart, duke ngritur një plan kombëtar për luftën kundër kanabisit, që nuk është gjë tjetër, veçse krijimi i linjave të reja të kultivimit të kanabisit. Bosi i drogës po djeg arat, tani që nuk kanë asnjë vlerë, me qëllim që të pastrohen mirë për të mbjellë kanabis të ri”, shkruan Braimllari në Facebook.