Sekuestrohen 4 automjete luksoze, u trafikuan nga BE

ELBASAN – Policia e qytetit të Elbasanit ka zhvilluar një operacion të gjerë për bllokimin e automjeteve motorike të trafikuara në Shqipëri nga vendet e BE- së. Në kuadër të operacionit “Summer 2017 Elbasani” u verifikuan 380 automjete motorike, si dhe u kontrolluan 520 shtetas. Nga këto, 28 persona u shoqëruan në komisariat, ndërsa katër automjete luksoze u sekuestruan pasi dyshohet se janë të trafikuara, si dhe nisi procedim penal për zotëruesit e tyre. Policia ka dyshime se këto automjete janë trafikuar nga vendet e BE- së, pasi kanë të falsifikuar numrin e shasisë. Automjetet e sekuestruara janë një “Mini Cooper”, dy “BMW” dhe një “Audi”. Ndaj katër zotëruesve të këtyre automjeteve, ka nisur procedim penal nga Prokuroria pranë Gjykatës së Shkallës së Parë Elbasan, për veprën penale “trafikim i mjeteve motorike” dhe “falsifikim i vulave, i stampave ose i formularëve”. Gjithashtu, në kuadër të zbatimit të plan– operacionit “Summer 2017 Elbasani” janë arrestuar 2 shtetas për veprën penale “prodhim dhe mbajtje pa leje e armëve luftarake dhe e municionit”. Gjatë operacionit, ku u kontrolluan 380 automjete motorike, gjithashtu u vendosën 150 masa administrative nga sektori i qarkullimit rrugor. Drejtues të Policisë së qytetit të Elbasanit bëjnë të ditur se edhe në ditët e ardhshme do të vijojë zbatimi i plan– operacionit “SUMMER 2017 Elbasani”, me qëllim evidentimin dhe goditjen e rasteve të trafikimit të automjeteve luksoze nga vende të ndryshme të Bashkimit Europian drejt vendit tonë. Shqipëria është një nga destinacionet kryesore të automjeteve të vjedhura në BE, të cilat më pas, përmes falsifikimit të numrit të shasisë, pajisen me dokumentacion të rregullt për qarkullim. m. s.