Kërkoi takim me Bashën, Boçi: Nikolla arrogancë e injorancë

Kreu i Departamentit të Arsimit në PD, Luçiano Boçi i ka cilësuar të papërgjegjshme reagimet e ministres së konfirmuar të Arsimit, Lindita Nikolla, lidhur me shqetësimet e ngritura nga opozita për keqmenaxhimin e shpërndarjes së teksteve shkollore. Në një reagim për mediat, deputeti demokrat ka kujtuar, se ndryshe nga pretendimet e Nikollës, procedurat e hartimit dhe shpërndarjes së teksteve shkollore janë hartuar nga vetë ministrja në kohën kur ishte në detyrë. "Përgjigjja e Ministres së Arsimit, Nikolla, për këtë shqetësim ishte jo vetëm arrogante, por edhe dëshmi e injorancës së saj mbi përgjegjësinë e detyrës që ushtron. Të gjitha procedurat e hartimit, shpërndarjes dhe vendosjes së çmimit për tekstet shkollore, edhe këtë vit, si çdo vit tjetër, janë kryer nga ministrja Nikolla. Për shkak të indiferencës së saj ndaj interesit publik e paaftësisë së saj dhe stafit të saj, të gjitha këto procedura janë bërë me vonesë dhe në mënyrë amatore, çfarë ka sjellë mungesë tekstesh, sistem klientelist shpërndarjeje me pak pika, çmime të rritura dhe në shumë raste tekste me cilësi të dobët", u shpreh Boçi. Duke i qëndruar idesë së kreut të opozitës, Lulzim Basha, deputeti i PD- së ka kërkuar nga ministrja që tekstet për klasat fillore të jenë falas. Boçi i ka kërkuar Nikollës të lërë kolltukun e saj dhe të shkojë të takojë dhe bisedojë me prindërit që janë në radhë duke pritur të sigurojnë tekstet shkollore për fëmijët e tyre. "Qëndrimi ynë për këtë çështje është i thjeshtë: prioriteti i qeverisë duhet të jetë mbështetja e arsimit fillor, duke ofruar falas tekstet shkollore. Qëndrimi i ministres dhe shefit të saj ka qenë po ashtu i qartë: prioriteti ka qenë rindërtimi i fasadës së ministrisë dhe blerja e kolltukëve luksozë për zyra, për të cilat kanë harxhuar miliona euro. Nëse, siç shprehet, ministrja është e gatshme të përmirësohet, le ta fillojë reflektimin duke lënë kolltukun e zyrës për të takuar prindërit. I gjen ata në radhët e gjata, në mes të vapës, duke harxhuar kursimet e mbledhura me mund për diçka që duhet të ishte falas", thekson Boçi.