Berisha: Fuga u kërcënua nga "Noriega", Prokuroria të hetojë
Ish- kreu i opozitës dhe qeverisë, Sali Berisha, ka reaguar ndaj "ultimatumit" që i është drejtuar akademikut Artan Fuga, pas letrës së hapur të këtij të fundit për zgjedhjet në Akademinë e Shkencave. Përmes një statusi në rrjetet sociale, Berisha shprehet:
"Ultimatumi ndaj akademikut Artan Fuga është mesazhi i narko- shtetit për mbarë intelektualët e vendit: - Konformohuni ose Largohuni! Akademiku Artan Fuga ka informuar dje publikun se atë, pas një letre që i ka dërguar Akademisë së Shkencave, e kanë kërcënuar me ultimatumin mafioz: "Hesht ose ik"!
Profesor Artan Fuga është sot zëri më i fuqishëm dhe më i pavarur i botës akademike të vendit, që ndan karrierën e tij akademike mes universiteteve të Tiranës dhe Parisit. Ai, me veprimtarinë, editorialet, publicistikën, në përmbushje të misionit të intelektualit, është një avokat i fuqishëm dhe i pamposhtur e i pavarur i interesit publik!
Ultimatumi stalinist mafioz kundër tij është ultimatum ndaj mbarë intelektualëve të vërtetë të këtij vendi, të cilët ose duhet të ulin kokën dhe të heshtin ose duhet të qërohen. Kësaj radhe, ky ultimatum nuk u dha nëpërmjet Shullazit për garën për një post, por u dha për fjalën e lirë, shprehjen e lirë të mendimit, për lirinë akademike, dhe ata që e porositën këtë, janë xhelatë të vërtetë të lirisë së shprehjes së mendimit, janë armiq të egër të intelektualit avokat dhe rolit e misionit të tij.
Një ultimatum i tillë i pashembullt nuk mund të jetë, pavarësisht nga gjurmët, vepër e Akademisë, as dhe e stafit të Universitetit Kristaq Rama, me të cilët Prof. Fuga ka pasur polemika dhe kundërshtira. Ky ultimatum, sipas frymës, duket se është vepër e Noriegës dhe zyrës së tij.
Duke shprehur solidaritetin tim të plotë me profesor Artan Fugën dhe dënuar me ashpërsinë më të madhe ultimatumin stalinist, mafioz të pushtetit ndaj tij, i bëj thirrje Prokurorit të Përgjithshëm të hetojë me përparësi këtë krim të shëmtuar, këtë akt të rëndë ndaj botës intelektuale dhe demokracisë, sikundër paralajmëroj Edi Ramën se heshtja jote ndaj këtij kërcënimi stalinisto- mafioz dëshmon se ti vet nuk je dorëjashtë, por duket se qëndron si porositës i këtij ultimatumi dhe se për çdo cenim të prof. Fugës, do të përgjigjesh personalisht me çdo gjë që meriton!"