Duka: Cikalleshi gaboi, e shlyen me gol ndaj Spanjës

Presidenti i FSHF- së, Armand Duka, mbështet trajnerin e ri të Kombëtares, Kristian Panuçin, për vendimin mbi sulmuesin Sokol Cikalleshi. Në një bisedë për "Supersport", kreu i institucionit të futbollit nuk ngurroi të bënte edhe një krahasim mes Panuçit dhe ishtrajnerit kuqezi, Xhani De Biazi. Fillimisht ai foli për ndeshjen e së shtunës. "Lihtenshtjeni për mua është një nga ndeshjet më të rëndësishme, pasi e konsideroj një kundërshtar shumë të vështirë. Duhet të jemi të gjithë shumë të angazhuar, për të dhënë një mesazh të rëndësisë së madhe që ka motivimi i skuadrës për këtë ndeshje. Sot është shumë e vështirë në futboll të ketë kundërshtarë të dobët, pavarësisht se opinionet janë të ndryshme. I dobët apo i fortë është ai që jep apo nuk jep maksimumin në fushë. Ne si skuadër nuk është se kemi kualitete të jashtëzakonshme që mund të fitojmë lehtë një takim", deklaroi dje presidenti i FSHF- së. Ai zbuloi edhe se çfarë ka thënë para skuadrës. "Lojtarëve u kam thënë se duhet të mendojmë vetëm për Lihtenshtejnin. Çdo ndeshje për ne është e rëndësishme dhe mund të arrijmë fitore vetëm nëse japim më shumë se 100 % ndaj Lihtenshtejnit dhe më pas të mendojmë për Maqedoninë, që është një tjetër histori me specifikat që ka", bëri të ditur Duka.

De Biazi vs. Panuçi - "Kam parë njëlloj motivimi dhe një energji më shumë nga Panuçi. Uroj që ta transmetojë skuadra në fushë. Me ulërimat nuk janë keq të dy ( qesh). Gjithsesi, nuk besoj se ulërimat të çojnë te fitorja. Te suksesi të çon arsyetimi dhe logjika, por gjithashtu menaxhimi me mençuri i sit- uatave", theksoi Duka.

Çështja "Cikalleshi" - Në fund, numri një i futbollit shqiptar komentoi edhe çështjen e Cikalleshit, duke i dhënë të drejtë trajnerit për vendimin që mori, duke pezulluar sulmuesin nga ndeshjet me Lihtenshtejnin dhe Maqedoninë. "Cikalleshi është një nga lojtarët që ka dhënë shumë për këtë skuadër. Ai është një djalë i mirë dhe shumë i disiplinuar, që nuk ka pasur asnjë precedent të tillë në të kaluarën. Kam komunikuar si me trajnerin, ashtu edhe me Cikalleshin. Realisht i kam thënë: ' Cike, këtë radhë ke gabuar dhe duhet të respektosh vendimin e trajnerit për të pushuar këto dy ndeshje'. Por, i kam thënë gjithashtu se me një gol kundër Spanjës mund t'i shlyejë të gjitha", përfundoi Duka, i cili ka qenë i pranishëm në të gjitha seancat stërvitore të trajnerit të ri, duke u dhënë në njëfarë mënyre mbështetje morale para debutimit.